30.05.2026 | 13:56
Նավթի գները նվազել են
Առանց վիզա՝ դեպի Եվրոպա․ երբ ՀՀ քաղաքացիները կկարողանան դյուրացված կարգով ԵՄ մեկնել. ՏԵՍԱՆՅՈՒԹ
Քաղաքականություն
14.11.2023 | 21:15
Եվրամիության երկրների արտգործնախարարները երեկ Բրյուսելում կայացած նիստի ժամանակ հավանություն են տվել Հայաստանի հետ վիզաների ազատականացման շուրջ քննարկումներն ակտիվացնելու առաջարկին։ Այս մասին հայտարարել է ԵՄ անվտանգության և արտաքին քաղաքականության հարցերով բարձր ներկայացուցիչ Ջոզեպ Բորելը։
Ի՞նչ է ենթադրում վիզաների ազատականացումը։ Հայաստանի եվրոպական կուսակցության նախագահ Տիգրան Խզմալյանի խոսքով՝ ՀՀ քաղաքացիները ստանալու են այն արտոնությունները, որոնք ունեն, օրինակ, Վրաստանի քաղաքացիները։
Պաշտոնական Երևանն աշխատանքներ է տանում՝ կարճ ժամանակում հասնելու ԵՄ-ի հետ վիզաների ազատականացման բանակցությունների մեկնարկին, այսօր հայտարարել է արտաքին գործերի նախարարի տեղակալ Պարույր Հովհաննիսյանը։
Թե կոնկրետ երբ Հայաստանի քաղաքացիները կկարողանան առանց վիզայի մեկնել եվրոպական երկրներ, առայժմ հայտնի չէ։ ԱԺ եվրոպական ինտեգրման հարցերի հանձնաժողովի նախագահ Արմեն Եղոյանը կարծում է, որ ՀՀ-ի պարագայում գործընթացն ավելի արագ կընթանա, քան Վրաստանի դեպքում։
Իշխանական պատգամավորը վստահեցնում է, որ գործածության մեջ է դրվելու վիզաների պարզեցված ռեժիմ։
«Հայաստան» խմբակցության պատգամավոր Քրիստինա Վարդանյանի խոսքով՝ դրական է, երբ ԵՄ-ն որոշումներ է կայացնում, որոնք միտված են ՀՀ քաղաքացիների ճանապարհորդելու դյուրացմանը, սակայն նա բուն ՀՀ տարածքում քաղաքացիների անվտանգությանն առնչվող հարցեր ունի։
ՀՀ քաղաքացիների համար վիզաների ազատականացման նախորդ քննարկումները պարբերաբար տապալվում էին ԵՄ անդամ որոշ երկրների դեմ լինելու պատճառով։ Այդ պետությունների անունները չէին հրապարակվում։ Այժմ ի՞նչ է փոխվել, որ ԵՄ-ն կտրուկ փոխել է իր դիրքորոշումը․ այս հարցում ևս հստակություն չկա։
Մանրամասները՝ տեսանյութում։
Նարեկ Կիրակոսյան
