Հնդկաստանը լայնածավալ զորավարժություններ է անցկացրել Չինաստանի հետ սահմանին

Հնդկաստանի ռազմաօդային ուժերը Չինաստանի հետ սահմանի երկայնքով հյուսիս-արևելյան նահանգներում մարտական ինքնաթիռներով և հակաօդային պաշտպանության համակարգերով Purvi Akash (Արևելյան երկինք) լայնածավալ օդային զորավարժություններ են անցկացրել: Այս մասին հայտնում է India Today-ը՝ վկայակոչելով երկրի Պաշտպանության նախարարությանը։

Զորավարժություններն անցկացվել են հոկտեմբերի 30-ից նոյեմբերի 4-ը։ Դրանցում ներգրավված են եղել Rafale, Tejas և Su-30 կործանիչներ, Prachand մարտական ուղղաթիռներ և S-400 հակաօդային պաշտպանության հրթիռային համակարգեր, ինչպես նաև Հնդկաստանի բանակի Արևելյան հրամանատարության առանձին ստորաբաժանումներ։

Վարժանքների ընթացքում մշակվել է ցամաքային զորքերի և օդուժի համակարգումը, իսկ զորավարժությունն ինքնին ուղղված է եղել հնարավոր սպառնալիքներին ի պատասխան ավիացիայի պաշտպանական և հարձակողական կարողությունների ցուցադրմանը։

Նշենք, որ Հնդկաստանի և Չինաստանի միջև տևական տարածքային վեճ կա։ Երկու երկրները նույնիսկ կռվել են իրենց սահմանի համար 1962 թվականին։

Հնդկական կողմը պնդում է, որ Չինաստանն ապօրինի կերպով զբաղեցնում է 38 հազար քառակուսի կիլոմետր տարածք Հիմալայան լեռնաշխարհում գտնվող Ակսայ Չին սարահարթում, որը Հնդկաստանը համարում է իր Լադախի շրջանը, և որտեղ պարբերաբար տեղի են ունենում ռազմական բախումներ։ 2020 թվականին սահմանի այս հատվածում տեղի ունեցած բախումների հետևանքով երկու կողմերից տասնյակ զինվորներ են զոհվել։