02.11.2024 | 15:05
«Գոյ» թատրոնը կվերսկսի իր բնականոն աշխատանքը
Բաքվում Իրանի և Իսրայելի դեսպանները փոխադարձ սպառնալիքներ են հնչեցրել
Քաղաքականություն
07.11.2023 | 22:55
Իսրայելա-պաղեստինյան հակամարտության սրման ֆոնին՝ Բաքվում Իրանի և Իսրայելի դեսպանները միմյանց հասցեին սպառնալիքներ են հնչեցնում։ Ադրբեջանական լրատվամիջոցների հաղորդմամբ՝ նախ նոյեմբերի 4-ին Բաքվում Իրանի դեսպան Աբբաս Մուսավին X-ի իր միկրոբլոգում գրել էր, որ «այս փուլում Իսրայելի համար ՀԱՄԱՍ-ի մարտիկները բավարար են, որոնք նրան կթաղեն Միջերկրական ծովում»։
«Դուք ելք չունենք, ամբողջ աշխարհը ձեր դեմ է։ Ինչպես ամբողջ աշխարհը, այնպես էլ Ադրբեջանի մահմեդական խիզախ ժողովուրդը, որն ատում է Ձեզ»,- գրել էր դեսպանը։
Այնուհետև նա ևս մեկ գրառում է արել։
«Է՛յ, բավական է, որ դուք ընդունել եք սարդոստայն լինելու իրականությունը: Ես զարմանում եմ, թե ինչու ձեր «Պողպատե ցանցը» չի կարողացել հաղթահարել ՀԱՄԱՍ-ի մի քանի մարտիկներին և փոխարենը սպանել է 10,000 խաղաղ բնակիչների, որոնցից 4,000-ը երեխաներ են: Այս ցանցը ձեր իսկ ձեռքերով կփաթաթվի ձեր մահվան համար»,- գրել է Մուսավին։
Բաքվում Իսրայելի դեսպան Ջորջ Դիքն այսպես է պատասխանել․ «Իրանի ռեժիմի դեսպանին՝ ահա մի քանի անվճար խորհուրդ պրոֆեսիոնալից։ Եթե ցանկանում եք, որ մարդիկ ձեզ լուրջ վերաբերվեն, երբ դուք սպառնում եք իմ երկրին ոչնչացմամբ, իսկ ինձ՝ մահվամբ (կրկին), ստիպված կլինեք հրաժարվել սարդոստայնի փոխաբերությունից: Սարդի մետաքսը հինգ անգամ ավելի ամուր է, քան պողպատը»։
Ադրբեջանի ԱԳՆ-ն դեռևս չի արձագանքել երկու երկրների դեսպանների միջև այս «փոխհրաձգությանը», ինչպես նաև չի մեկնաբանել Իրանի դեսպանի հայտարարությունը, որ ադրբեջանցիներն «Իսրայելին դեմ են»։
Էմմա Չոբանյան
