06.06.2026 | 01:06
«Ուժեղ Հայաստանի» մասնակցությունը կվիճարկվի՞ Վարչական դատարանում, թե՞ ոչ․ «Հանրապետության» անդամը՝ իրենց որոշման մասին
Իսրայելին ուղղված Էրդողանի քննադատությունները գերմանացի գործիչների զայրույթն են առաջացրել․ Թուրքիայի նախագահի այցը Գերմանիա մնում է անորոշ
Քաղաքականություն
03.11.2023 | 22:17
Գերմանացի քաղաքական գործիչները տարբեր ճամբարներից քննադատում են Թուրքիայի նախագահ Ռեջեփ Թայիփ Էրդողանի հայտարարությունները իսրայելա-պաղեստինյան հակամարտության վերաբերյալ։ Գերմանացի քաղաքական գործիչները վերապահումներ են հայտնել Էրդողանի՝ նոյեմբերի կեսերին սպասվող Գերմանիա այցի վերաբերյալ, գրում է Duvar-ը։
Իշխող կոալիցիայի անդամ, Ազատ դեմոկրատական կուսակցության գլխավոր քարտուղար Բիժան Ջիր Սարայը հայտարարել է, որ «Էրդողանի ատելության խոսքը Իսրայելի դեմ և նրա համերաշխությունը ՀԱՄԱՍ ահաբեկչական կազմակերպության հետ անհանդուրժելի է»։ Նա նաև ասել է, որ Էրդողանի այցն այս պայմաններում «շատ խնդրահարույց» է լինելու։
«Մենք պետք է կասկածի տակ դնենք Էրդողանին Բեռլինում դիմավորելու հարցը»,- նշել է նա։
Բունդեսթագի Անվտանգության հարցերի հանձնաժողովի ղեկավար Մարի Ագնես Ստրաք-Զիմերմանը ևս դժգոհություն է հայտնել։
«Էրդողանի հայտարարությունները, որոնք մարդկանց կրոնական պատերազմի կոչ են անում, կարծես, մենք ապրում ենք միջնադարում, սարսափելի են։ Այնուամենայնիվ, կարևոր է, որ մենք մնանք երկխոսության մեջ»,- ասել է նա։
Սոցիալ-դեմոկրատական կուսակցության պատգամավոր Մաքիթ Քարաահմեթօղլուն իր հերթին վստահություն է հայտնել, որ կանցլեր Օլաֆ Շոլցը հստակ դիրքորոշում կընդունի Էրդողանի՝ «ՀԱՄԱՍ-ի հարձակումները որպես անվնաս ներկայացնելու փորձերի դեմ»։
Գերմանիայի հրեաների կենտրոնական խորհրդի ղեկավար Յոզեֆ Շուստերը դատապարտել է Էրդողանի հայտարարությունները՝ դրանք անվանելով «չափազանց մտահոգիչ»։
Հիշեցնենք՝ Էրդողանը, դիմելով Իսրայելին, հայտարարել էր․ «Արևմուտքը ձեզ շատ բան է պարտական։ Բայց Թուրքիան ձեզ ոչինչ պարտք չէ։ ՀԱՄԱՍ-ն ահաբեկչական կազմակերպություն չէ, այլ ազատագրական, մոջահեդների խմբավորում, որը պայքարում է իր հողերն ու քաղաքացիներին պաշտպանելու համար»։
Էմմա Չոբանյան
