02.11.2024 | 16:34
Երևանի 2 վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Մոսկվան և Բաքուն քննարկել են Ադրբեջանի միջոցով ռուսական էներգակիրների տարանցումն ու նավթագազային ոլորտում համագործակցությունը
Քաղաքականություն
01.11.2023 | 22:08
ՌԴ փոխվարչապետ Ալեքսանդր Նովակը նախօրեին հանդիպել է Ադրբեջանի էկոնոմիկայի նախարար Միքայիլ Ջաբարովի հետ։ Զրուցակիցները քննարկել են նավթի և գազի, էլեկտրաէներգիայի ոլորտներում երկու երկրների համագործակցության ընդլայնմանն ու վերականգնվող էներգիայի աղբյուրների զարգացմանը վերաբերող հարցեր, հաղորդում է ՌԴ կառավարության մամուլի ծառայությունը։
Նշվել է երկրների միջև առևտրաշրջանառության աճը․ 2022 թվականի վերջին փոխադարձ առևտրի ծավալն աճել է 25%-ով։ 2023 թվականի հունվար-օգոստոսին ապրանքաշրջանառությունը, նախորդ տարվա նույն ժամանակահատվածի համեմատ, աճել է 15,7%-ով։
«Ռուսական նավթագազային խոշորագույն կոնցեռններն աշխատում են Ադրբեջանի հետ և պատրաստ են ընդլայնել համագործակցությունը։ Մասնավորապես, մի շարք նոր նախաձեռնություններ կան ադրբեջանական հզորություններով ռուսական ածխաջրածինների տարանցման և վերամշակման համար։ Խնդիրը մեր ջանքերի համախմբումն է»,- նշել է Ալեքսանդր Նովակը։
Բանակցությունների օրակարգում է եղել ռուսական նավթազազային ընկերությունների մասնակցությունն Ադրբեջանի տարածքում արդյունահանման նոր նախագծերին, երկրում վառելիքի վաճառքի ծավալների մեծացման, այդ թվում՝ Տիխորեցկ-Բաքու նավթամուղով ռուսական նավթի ռևերսային մատակարարումների ավելացման հարցերը։
Հաղորդվում է, որ քննարկվել են նաև ներմուծման փոխարինման քաղաքականության շրջանակում ռուսական և ադրբեջանական ընկերությունների միջև տեխնոլոգիական համագործակցության ստեղծման հեռանկարները։
Հիշեցնենք, որ դեռևս հոկտեմբերի սկզբին Մոսկվայում Ադրբեջանի էներգետիկայի նախարար Փարվիզ Շահբազովը և ՌԴ փոխվարչապետ Ալեքսանդր Նովակը քննարկել էին Տիխորեցկ-Բաքու նավթամուղի ընդլայնման հարցը, որը ՌԴ-ից նավթի ռևերսային մատակարարումների հնարավորություն կտա։ Նովակը հայտարարել էր, որ նավթամուղի ընդլայնումից հետո նավթի մատակարարումների ծավալը դեպի Ադրբեջան հետագայում կարող է հասնել մինչև 4 մլն տոննայի։ Նման տարբերակն ավելի շատ ձեռնտու է Ադրբեջանին, որը ռուսական նավթի վերամշակմամբ կկարողանա շահույթով արտահանել իր նավթը։
Ի դեպ, նախօրեին Ռուսստանում գտնվող Ադրբեջանի փոխվարչապետ Շահին Մուստաֆաևն էլ հանդիպել է ՌԴ առաջին փոխվարչապետ Անդրեյ Բելոուսովին։ Զրույցի ընթացքում կողմերը քննարկել են «Հյուսիս-Հարավ» միջազգային տրանսպորտային միջանցքի երկաթուղային ուղու զարգացման հարցերը։
Էմմա Չոբանյան
