Քաղաքականություն
31.10.2023 | 21:44
Ճապոնիայի իշխանությունները բողոք են հայտնել Մոսկվային՝ ռուսական ուղղաթիռի կողմից երկրի օդային տարածքը խախտելու կապակցությամբ։ Այս մասին գրում է Kyodo News-ը։
Ճապոնիայի Պաշտպանության նախարարության տվյալներով՝ միջադեպը տեղի է ունեցել երեքշաբթի՝ տեղական ժամանակով 12:44-ի սահմաններում։
Ռուսական ինքնաթիռը խախտել է Ճապոնիայի օդային տարածքը Նեմուրո թերակղզու մոտակայքում։ Խախտմանն ի պատասխան՝ երկրի ռազմաօդային ուժերը կործանիչներ են օդ բարձրացրել։
Նշվում է, որ ի պատասխան նման գործողությունների՝ Տոկիոն դիվանագիտական խողովակներով խիստ բողոք է հայտնել Մոսկվային։
Ռուսական ուղղաթիռի հետ կապված նմանատիպ իրավիճակ է եղել նաև 2022 թվականի մարտին այն բանից հետո, երբ Ճապոնիան, արևմտյան շատ երկրների հետ միասին, սկսել է տնտեսական պատժամիջոցներ կիրառել Ռուսաստանի Դաշնության դեմ։
Անցյալ տարվա օդային տարածքի խախտումը տեղի է ունեցել Ճապոնիայի հյուսիսային տարածքների՝ Հարավային Կուրիլյան կղզիների մոտ, որոնց հավակնում է Մոսկվան:
