Քաղաքականություն
31.10.2023 | 17:27
Ֆրանսիայի նախագահ Էմանուել Մակրոնը կայցելի Ղազախստան և Ուզբեկստան։ Ուղևորությունը կապված է ուրանի մատակարարումն ընդլայնելու՝ Ֆրանսիայի ցանկության հետ։ Այս մասին հայտնում է Bloomberg-ը՝ վկայակոչելով երկու աղբյուրի։
Ֆրանսիայի ուրանի կարիքը կապված է Նիգերում էներգետիկ ռեսուրսների արտադրության դադարեցման հետ։ Կենտրոնական Ասիայի երկրներն իրենց հերթին շահագրգռված են ընդլայնել համագործակցությունը՝ Ռուսաստանի և Չինաստանի ազդեցությունը նվազեցնելու համար։
Նիգերում ռազմական հեղաշրջումից հետո այս երկրում ուրանի հանքաքարի ֆրանսիական արդյունահանումը դադարեցվել է, գրում է գործակալությունը։ Ֆրանսիական Orano SA ընկերությունը ղազախական Kazatomprom-ի հետ միասին արդեն իսկ մշակում է ուրանի հանքավայրերը Ղազախստանում և, ըստ Bloomberg-ի աղբյուրների, իր առաջիկա այցի ընթացքում Մակրոնը կքննարկի այդ համագործակցության ընդլայնման հարցը։ Ֆրանսիայի Ֆինանսների նախարարության տվյալներով՝ անցյալ տարի Ղազախստանը դարձել է երկրին ուրանի ամենախոշոր մատակարարը։
Գործակալությունը նշում է, որ նախագահի այցը նախատեսված է նոյեմբերի 1-2-ը, սակայն այցի մասին Ֆրանսիայի նախագահի կայքում չի հայտարարվել։ Ելիսեյան պալատի խոսնակն ասել է, որ նախագահը ուղևորության կմեկնի էներգետիկ, ագրոպարենային և հանքարդյունաբերական ոլորտներից 15 գործարար առաջնորդներից բաղկացած պատվիրակության հետ, ներառյալ՝ կոմունալ Electricite de France SA և ինժեներական Assystem SA ընկերությունները, որոնք կառուցում են ատոմակայաններ:
Իր հերթին, Ղազախստանը շահագրգռված է համագործակցությամբ, որպեսզի նվազեցնի Ռուսաստանի ազդեցությունը և Չինաստանի ճնշումը, հայտնում է Bloomberg-ը։ Իսկ Ֆրանսիան գործում է Ռուսաստանի էներգետիկ ռեսուրսների օգտագործումը դադարեցնելու՝ Եվրամիության ռազմավարության համաձայն։
