Քաղաքականություն
30.10.2023 | 22:44
G7-ի երկրները համաձայնության են եկել ընդհանուր սկզբունքների շուրջ, որոնց պետք է հետևեն արհեստական բանականություն (AI) մշակողները, ներառյալ՝ դրա միջոցով ստեղծված բովանդակության պիտակավորման համակարգի ներդրումը: «Մեծ յոթնյակի» երկրների ղեկավարներն այս կապակցությամբ հայտարարություն են տարածել։
«Մենք՝ G7-ի ղեկավարներս, շեշտում ենք առաջադեմ արհեստական բանականության համակարգերի նորարարական հնարավորություններն ու ներուժը։ Մենք նաև գիտակցում ենք ռիսկերը՝ կառավարելու և՛ առանձին անձանց, հասարակությունը, և՛ մեր ընդհանուր սկզբունքները, ներառյալ՝ օրենքի գերակայությունը և ժողովրդավարական արժեքները պաշտպանելու անհրաժեշտությունը»,- ասվում է հաղորդագրության մեջ։
G7-ի անդամները կոչ են անում արհեստական բանականություն ստեղծողներին մշակել և ներդնել մեխանիզմներ՝ բովանդակության իսկությունը և դրա ծագումը հաստատելու համար այն դեպքերում, երբ «դա տեխնիկապես հնարավոր է», այդ թվում՝ պիտակավորման և «այլ մեթոդների միջոցով, որոնք թույլ կտան օգտատերերին բացահայտել AI-ի կողմից ստեղծված բովանդակությունը»:
Արհեստական բանականություն ստեղծողներին կոչ է արվում քայլեր ձեռնարկել զարգացման բոլոր փուլերում ռիսկերը բացահայտելու և մեղմելու համար՝ բացահայտելով և շտկելով խոցելիությունները, ինչպես նաև «աննորմալությունները և չարաշահման օրինաչափությունները»:
