02.11.2024 | 17:34
ՀՀ առողջապահության և էկոնոմիկայի նախարարները քննարկել են Հայաստանում առողջապահական զբոսաշրջության զարգացման միտումները
Ադրբեջանը բրյուսելյան հարթակում բանակցություններից հրաժարվում է «ճնշման մթնոլորտի պատճառով»
Քաղաքականություն
27.10.2023 | 22:30
Օրերս Հարավային Կովկասի և Վրաստանում ճգնաժամի հարցերով Եվրամիության հատուկ ներկայացուցիչ Տոյվո Կլաարը հայտնել էր, որ հոկտեմբերի վերջին ԵՄ խորհրդի նախագահ Շառլ Միշելի, Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպում տեղի չի ունենա: Կլաարը դա պատճառաբանել էր ժամանակի սղությամբ:
«Մեր նպատակն է, որ Ղարաբաղի հայերը վերադառնան իրենց տուն: Կարևորելով Գրանադայի հանդիպումը, որին չէր մասնակցել Իլհամ Ալիևը, մենք փորձում ենք հիմա Բրյուսելում կազմակերպել Փաշինյան-Ալիև հանդիպում»,- ասել է ԵՄ պաշտոնյան։
Այս հայտարարությունից հետո հայկական կողմից վարչապետի և ԱԳ նախարարի մակարդակով հայտարարվել էր, որ բանակցություններից հրաժարվող կողմը կրկին Ադրբեջանն է, որն արդեն երկրորդ անգամ է մերժում բրյուսելյան հարթակում հանդիպումը։
Մինչ այդ, ադրբեջանական լրատվամիջոցներն այս օրերին տարբեր հրապարակումներ են անում՝ փորձելով բանակցություններից հրաժարումը արդարացնել, իբր, Արևմուտքի «կողմնակալ վերաբերմունքով» և պնդմամբ, թե այդ հարթակի անհրաժեշտությունը չկա։
Ադրբեջանական իշխանամերձ Միջազգային հարաբերությունների վերլուծության կենտրոնի նախագահ Ֆարիդ Շաֆիևն էլ հայտարարել է, թե ներկայում, վերջին իրադարձությունների պատճառով, «Բաքուն Եվրոպային չի դիտարկում որպես չեզոք միջնորդ»։ Նա նշել է, թե «ներկայում եվրոպական հարթակում՝ Բրյուսելում, մթնոլորտ է տիրում, որը հակված է Ադրբեջանի վրա ճնշում գործադրել, և որ Ֆրանսիան մեծ դեր է խաղացել դրա ձևավորման գործում»։
«Բրյուսելի ձևաչափում մենք շատ բանի ենք հասել, բայց իրականությունն այն է, որ ներկայիս իրավիճակը չի գոհացնում Ադրբեջանին։ Ներկայում արդեն պայմաններ կան Հայաստանի հետ ուղիղ, առանց միջնորդների հանդիպելու համար։ Այդ հանդիպման համար կարող եք ընտրել տարբեր վայրեր, որոնցից ամենամոտը Թբիլիսին է: Բայց խնդիրը ոչ թե անցկացման վայրի, այլ հիմնական ձևաչափի մեջ է։ Մենք Եվրոպային որպես չեզոք միջնորդ չենք համարում վերջին իրադարձությունների պատճառով, դա է խնդիրը»,- հայտարարել է Շաֆիևը։
Բաքվի համար «նախընտրելի և չեզոք միջնորդը» Ռուսաստանն է, ինչի մասին ավելի վաղ հայտարարել էր Ադրբեջանի նախագահ Իլհամ Ալիևը։
Էմմա Չոբանյան
