Քաղաքականություն
25.10.2023 | 17:00
Բաքվում նախօրեին տեղի է ունեցել «Եվրամիություն-Ադրբեջան հարաբերությունները նոր Արևելյան գործընկերության քաղաքականության մեջ» խորագրով համաժողով, այն ժամանակում, երբ ԵՄ-ն վերանայում է իր Արևելյան գործընկերության ռազմավարությունը՝ գլոբալ աշխարհաքաղաքականության փոփոխության պայմաններում:
Համաժողովը նախապատրաստվել է մի շարք խնդիրների լուծման համար. որտե՞ղ է Ադրբեջանը դիրքավորվելու Արևելյան գործընկերության վերանայված քաղաքականության շրջանակում, ի՞նչ մարտահրավերներ և հնարավորություններ են սպասվում Ադրբեջանի եվրաինտեգրմանը, ինչպե՞ս կարող են ԵՄ-ի և Ադրբեջանի հարաբերություններն ուղղված լինել տարածաշրջանային անվտանգության և կայունության ամրապնդմանը և, ամենակարևորը, ինչպե՞ս կարող է քաղաքացիական հասարակությունն ակտիվորեն նպաստել հայաթափված Արցախի «եվրաինտեգրման և վերաինտեգրման երկակի նպատակների իրականացմանը»։
Ադրբեջանական լրատվամիջոցների հաղորդմամբ՝ այս բարդ հարցերն անպատասխան են մնացել ծրագրված եռակողմ քննարկման ընթացքում, որին պետք է մասնակցեին Ադրբեջանի կառավարությունը, քաղհասարակությունն ու ԵՄ ներկայացուցիչները։
Թեպետ նախապես ծրագրված հանդիպմանը՝ Ադրբեջանի իշխանությունները վերջին պահին որոշել են անտեսել միջոցառումը։ Որոշումն անակնկալ է եղել՝ հաշվի առնելով նախագահի աշխատակազմի և խորհրդարանի պաշտոնյաների նախնական հայտարարությունները մասնակցության վերաբերյալ:
Ադրբեջանում ԵՄ պատվիրակության ղեկավար Պյոտր Միխալկոն ու Բելգիայի դեսպան Միշել Պետերմանը հայտնվել են բարդ իրավիճակում՝ դիվանագիտորեն ընդունելով ԵՄ-Ադրբեջան հարաբերությունների բարդ բնույթը։
Էմմա Չոբանյան
