Ալիևը Ֆրանսիային մեղադրել է «ՄԱԿ-ի ԱԽ անդամի կարգավիճակը չարաշահելու, կանխակալ քաղաքականություն վարելու» մեջ

Ադրբեջանի նախագահ Իլհամ Ալիևը Ֆրանսիային մեղադրել է «ՄԱԿ-ի Անվտանգության խորհրդի մշտական ​​անդամի կարգավիճակը չարաշահելու, կանխակալ քաղաքականություն վարելու, ինչպես նաև աշխարհի տարբեր տարածաշրջաններում աշխարհաքաղաքական ինտրիգներ վարելու համար»։ Այս մասին Ալիևը հայտարարել է Բաքվում անցկացվող «Նեոգաղութատիրություն. մարդու իրավունքների խախտում և անարդարություն» համաժողովի մասնակիցներին ուղղված իր ուղերձում։

Արցախն էթնիկ զտումների ենթարկած Ադրբեջանի նախագահը նշել է, թե «ընդհանուր առմամբ, մարդկության գաղութային պատմության արյունալի հանցագործությունների մեծ մասը կատարվել է Ֆրանսիայի կողմից» և ֆրանսիական բանակին մեղադրել «զանգվածային սպանությունների մեջ»։

«Ֆրանսիան, որը պետք է ամաչի արյունալի հանցագործություններով հարուստ իր գաղութային պատմության համար, կատարված վայրագությունների համար ներողություն խնդրելու փոխարեն՝ խոսում է այլ երկրներում «հորինված» էթնիկ զտումների մասին։ Այս երկիրը չարաշահում է ՄԱԿ-ի Անվտանգության խորհրդի մշտական ​​անդամի կարգավիճակը՝ կողմնակալ քաղաքականություն վարելով և տարբեր տարածաշրջաններում աշխարհաքաղաքական ինտրիգներով զբաղվելով»,- ասել է Ալիևը։

Բացի այդ, նա չի մոռացել Հայաստանին ու նրա դաշնակից Ֆրանսիային անհիմն մեղադրել «ականային ահաբեկչության մեջ»։

Հավելենք, որ Հայաստանի դեմ Ադրբեջանը նաև ՄԱԿ-ի Արդարադատության միջազգային ատյանին էր դիմել ականների հարցով, սակայն դատարանն արդեն երկու անգամ մերժել է Բաքվի դիմումը ՀՀ-ի դեմ ժամանակավոր միջոցներ կիրառելու վերաբերյալ։

Էմմա Չոբանյան