24.11.2024 | 13:22
ՏԿԵ նորանշանակ նախարարն ընտրվել է ՔՊ Արմավիրի տարածքային կազմակերպության խորհրդի նախագահ
Եգիպտոսի նախագահը մերժել է Գազայից փախստականներին ընդունելու հնարավորությունը՝ առաջարկելով նրանց տեղավորել Իսրայելի անապատում
Քաղաքականություն
18.10.2023 | 21:41
Գերմանիան կաջակցի Եգիպտոսի ջանքերին՝ ուղղված Իսրայելի և ՀԱՄԱՍ-ի միջև հակամարտությունը թուլացնելուն։ Այս մասին Կահիրեում Եգիպտոսի նախագահ Աբդել Ֆաթահ ալ Սիսիի հետ հանդիպման ավարտին հայտարարել է Գերմանիայի կանցլեր Օլաֆ Շոլցը, գրում է DW-ի ռուսական ծառայությունը։
«Եգիպտոսի հետ միասին մենք ցանկանում ենք աշխատել պատերազմի սարսափելի հետևանքները մեղմելու ուղղությամբ»,- ասել է Շոլցը։
Նա խոստացել է Սիսիին օգնություն ցուցաբերել հոկտեմբերի 7-ին Իսրայելի վրա իրականացված զանգվածային հարձակման ժամանակ ՀԱՄԱՍ-ի պատանդներին ազատելուն ուղղված ջանքերում: Կանցլերը նաև շնորհակալություն է հայտնել ալ-Սիսիին՝ հակամարտությունը թուլացնելու փորձի և Իսրայելի ու ՀԱՄԱՍ-ի միջև միջնորդության համար։
Շոլցը նաև հայտարարել է Գազայի հատվածի բնակիչներին շտապ հումանիտար օգնություն ցուցաբերելու անհրաժեշտության մասին։
«Պաղեստինցիները ՀԱՄԱՍ չեն, և ՀԱՄԱՍ-ն իրավունք չունի խոսել պաղեստինցիների անունից»,- ասել է Գերմանիայի կանցլերը։
Նրա խոսքով՝ Բեռլինի նպատակներից մեկն է՝ պաշտպանել Գազայի հատվածի խաղաղ բնակչությանը և հնարավորինս արագ հումանիտար օգնություն ցուցաբերել։
Իր հերթին, Եգիպտոսի նախագահ Աբդել Ֆաթահ ալ-Սիսին մերժել է Գազայի հատվածից պաղեստինցի փախստականներին ընդունելու հնարավորությունը։
«Գազայից մարդկանց վտարելու գաղափարն իրագործելի չէ։ Մենք զգուշացնում ենք դրա հետ կապված ռիսկերի մասին»,- ասել է Եգիպտոսի նախագահը։
Նրա խոսքով՝ այդ դեպքում պաղեստինցիները կարող են սկսել հարձակումներ Իսրայելի վրա Սինայի թերակղզուց, ինչի համար Եգիպտոսը հետագայում կարող է պատասխանատվության ենթարկվել։ Միաժամանակ, Եգիպտոսի նախագահն առաջարկել է օգտագործել իսրայելական Նեգև անապատը Գազայի հատվածից փախստականներին տեղավորելու համար։
Սիսին նաև կոչ է արել միջազգային հանրությանը շտապ միջոցներ ձեռնարկել Գազայի խաղաղ բնակչության դեմ «կանխամտածված գործողությունները» դադարեցնելու համար։
Հավելենք, որ նախօրեին Շոլցը այցով գտնվում էր Իսրայելում։
Էմմա Չոբանյան
