30.04.2026 | 18:19
ԱԺ հանձնաժողովը դրական եզրակացություն է տվել Արտաքին հետախուզության ծառայության մասին օրենքում փոփոխությունների նախագծին
Մոսկվայում ձերբակալվել են Ալեքսեյ Նավալնիի փաստաբանները
Քաղաքականություն
13.10.2023 | 20:08
Մոսկվայում անվտանգության ուժերը ձերբակալել են ընդդիմադիր գործիչ Ալեքսեյ Նավալնիին պաշտպանող երեք փաստաբանների։ Mediazona-ի փոխանցմամբ՝ քննիչները ձերբակալել են Իգոր Սերգունինին, Վադիմ Կոբզևին և Ալեքսեյ Լիպցերին, գրում է DW-ի ռուսական ծառայությունը։
«Նավալնիի թիմ» Telegram ալիքը պարզաբանում է, որ փաստաբանները կալանավորվել են Քրեական դատավարության օրենսգրքի 91-րդ հոդվածով (կասկածյալին կալանավորելու հիմքերը): Փաստաբանների կալանավորման մասին տեղեկությունը հաստատել է նաև Նավալնիի մամուլի քարտուղար Կիրա Յարմիշը։
Ավելի վաղ փաստաբանների մոտ խուզարկություններ էին իրականացվել։ Այս մասին, մասնավորապես, հայտնել է Նավալնիի հիմնած Հակակոռուպցիոն հիմնադրամի (FBK) տնօրեն Իվան Ժդանովը։
«Իհարկե, այս ամենը Նավալնիին ամբողջությամբ մեկուսացնելու քայլեր են»,- համոզված է նա։
Փաստաբանները հետաքննվում են ծայրահեղական համայնքին մասնակցության մեղադրանքով, նրանց սպառնում է մինչև վեց տարվա ազատազրկում, X-ում գրել է Նավալնիի թիմի իրավաբանական բաժնի ղեկավար Վյաչեսլավ Գիմադին։
