15.05.2026 | 23:20
Հուլիսի 1-ից Երևան-Բուխարեստ նոր ուղիղ չվերթ կմեկնարկի
ԱՄՆ-ն, Մեծ Բրիտանիան, Ֆրանսիան, Գերմանիան և Իտալիան համատեղ հայտարարությամբ ընդգծում են Իսրայելին իրենց միասնական աջակցությունը
Քաղաքականություն
10.10.2023 | 21:48
ԱՄՆ-ի, Գերմանիայի, Մեծ Բրիտանիայի, Ֆրանսիայի ու Իտալիայի առաջնորդները համատեղ հայտարարությամբ են հանդես եկել, որում դատապարտում են Իսրայելի վրա ՀԱՄԱՍ խմբավորման հարձակումը և հայտնել իրենց «հաստատուն միասնական աջակցությունը» Իսրայելի ժողովրդին և կառավարությանը, գրում է VOA-ն։
«Առաջիկա օրերին մենք կպահպանենք միասնականությունը և կհամակարգենք մեր համատեղ գործողությունները՝ որպես դաշնակիցներ և որպես Իսրայելի բարեկամներ, որպեսզի Իսրայելը կարողանա պաշտպանել իրեն և պայմաններ ստեղծվի խաղաղ ու ինտեգրված Մերձավոր Արևելքի տարածաշրջանի համար»,- ասվում է ԱՄՆ նախագահ Ջո Բայդենի, Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Իտալիայի վարչապետ Ջորջիա Մելոնիի և Մեծ Բրիտանիայի վարչապետ Ռիշի Սունակի համատեղ հայտարարության մեջ։
Նրանք նշում են, որ ՀԱՄԱՍ-ի գործողությունները արդարացում չունեն և ենթակա են ընդհանուր դատապարտման։
«Ահաբեկչությունը երբեք չի կարող արդարացվել։ Վերջին օրերին աշխարհը սարսափով հետևում էր, թե ինչպես են ՀԱՄԱՍ-ի ահաբեկիչները կոտորում ընտանիքներին իրենց տներում, երաժշտական փառատոնի ժամանակ սպանում ավելի քան 200 երիտասարդի և առևանգում տարեց կանանց, երեխաներին և ամբողջ ընտանիքներին, որոնք այժմ պատանդ են պահվում։ Մեր երկրները կաջակցեն Իսրայելին իր ջանքերում»,- ասվում է հայտարարության մեջ։
Փաստաթղթում նաև ընդգծվում է, որ ՀԱՄԱՍ-ը չի ներկայացնում Պաղեստինի ժողովրդին և «ոչինչ չի առաջարկում Պաղեստինի ժողովրդին, բացի ավելի շատ սարսափից և արյունահեղությունից»։
