18.12.2025 | 21:39
Երևանում և 9 մարզում էլեկտրաէներգիայի անջատումներ կլինեն
ՌԴ Պետդուման կքննարկի միջուկային փորձարկումների արգելման պայմանագրից հրաժարվելու հարցը
Քաղաքականություն
06.10.2023 | 22:53
ՌԴ Պետդումայի խորհուրդն առաջիկա նիստում կքննարկի Միջուկային համապարփակ համաձայնագրի վավերացումը չեղարկելու հարցը։ Այս մասին իր Telegram-ալիքում հայտնել է խորհրդարանի Ստորին պալատի նախագահ Վյաչեսլավ Վոլոդինը, փոխանցում է DW-ի ռուսական ծառայությունը։
«Սա համապատասխանում է մեր պետության ազգային շահերին, և դա կլինի հայելային պատասխան ԱՄՆ-ին, որը դեռևս չի վավերացրել պայմանագիրը»,- ասել է Վոլոդինը:
Պետդումայի խոսնակն անդրադարձել է նաև ՌԴ նախագահ Վլադիմիր Պուտինի՝ նախօրեին արած հայտարարությանը, թե Ռուսաստանը կատարել է միջուկային էներգիայով միջմայրցամաքային թևավոր հրթիռի «վերջին հաջող փորձարկումը»։
«Իրավիճակն աշխարհում փոխվել է։ Վաշինգտոնը և Բրյուսելը պատերազմ են սկսել մեր երկրի դեմ։ Այսօրվա մարտահրավերները նոր լուծումներ են պահանջում»,- գրել է Վոլոդինը։
Միջուկային փորձարկումների համապարփակ արգելքի պայմանագիրն ընդունվել է ՄԱԿ-ի Գլխավոր վեհաժողովի կողմից 1996 թվականին։ Ռուսաստանը վավերացրել է փաստաթուղթը, ԱՄՆ-ն ու Չինաստանը՝ ոչ։ Այս մասին հիշեցնելով՝ Պուտինը թույլ է տվել հետ կանչել վավերացումը նախորդ օրը ունեցած ելույթի ժամանակ։
«Տեսականորեն հնարավոր է չեղյալ համարել վավերացումը, և եթե մենք դա անենք, դա միանգամայն բավարար կլինի»,- ասել է ՌԴ նախագահը։
ԽՍՀՄ-ն իր վերջին միջուկային փորձարկումն իրականացրել է 1990 թվականին, Ռուսաստանը երբեք չի իրականացրել: ԱՄՆ-ն փորձարկում է արել 1992 թվականին։ Այդ ժամանակից ի վեր ամբողջ աշխարհում 10 փորձարկում է իրականացվել. Հնդկաստանը և Պակիստանը երկուական փորձարկում են անցկացրել 1998 թվականին, իսկ մնացած բոլորը՝ Հյուսիսային Կորեան։
