02.11.2024 | 19:00
Ժողովրդին տալիս են հաց և հանդես ու քանդում են Երևանը, ուղեղները թամաշաներից մթագնել է. Տեր-Գաբրիելյան. ՏԵՍԱՆՅՈՒԹ
Բաքուն արձագանքել է Էմանուել Մակրոնի հայտարարություններին
Քաղաքականություն
06.10.2023 | 12:21
Բաքուն կրկին դժգոհ է Ֆրանսիայի նախագահ Էմանուել Մակրոնի՝ այս անգամ Գրանադայում Եվրոպական քաղաքական համայնքի գագաթնաժողովի շրջանակում արված հայտարարություններից։
«Մենք խստորեն դատապարտում և մերժում ենք հոկտեմբերի 5-ին Գրանադայում Եվրոպական քաղաքական համայնքի գագաթնաժողովի շրջանակում մամուլի ասուլիսի ժամանակ Ֆրանսիայի նախագահ Էմանուել Մակրոնի անհիմն մեղադրանքները Ադրբեջանի հասցեին։ Միջոցառման մասնակիցներից յուրաքանչյուրը քաջատեղյակ է, որ հենց ֆրանսիական կողմն է դեմ արտահայտվել Թուրքիայի մասնակցությանը Գրանադայի հանդիպմանը: Ֆրանսիայի նախագահի կողմից այդ հարցում կեղծ տեղեկությունների տարածումը պետության ղեկավարին անհարիր մոտեցում է»,- ասվում է Ադրբեջանի ԱԳՆ հայտարարության մեջ։
Բացի այդ, Ադրբեջանի ԱԳՆ-ն նշել է, թե, իբր, Հայաստանի որևէ սուվերեն տարածք չի օկուպացրել, նաև փորձել արդարացնել Արցախում իրականացրած էթնիկ զտումը։
«Ֆրանսիական կողմին, որը կոչ է անում ճնշում գործադրել Ադրբեջանի վրա, ուզում ենք հիշեցնել, որ Ադրբեջանի հետ ճնշման լեզվով խոսելն անիմաստ է և անընդունելի»,- ասվում է հայտարարության մեջ։
Հավելենք, որ նախօրեին Էմանուել Մակրոնը դատապարտել էր Ադրբեջանին Լեռնային Ղարաբաղում ռազմական գործողություններ իրականացնելու համար՝ պնդելով, որ Ֆրանսիայի կառավարության դիրքորոշումը ճիշտ է, եթե նույնիսկ Բաքուն այն համարում է կողմնակալ։
«Ֆրանսիան Ադրբեջանի հետ խնդիրներ չունի, բայց Ադրբեջանը, կարծես, խնդիրներ ունի միջազգային իրավունքի հետ»,- ասել էր Մակրոնը։
Նա նաև նշել է, որ այժմ պահանջկոտության, հստակության, պարտավորությունների պահպանման և ռազմական աջակցության ժամանակն է և այդ տարբերակն է ընտրել Ֆրանսիան:
«Այժմ պատժամիջոցների ժամանակը չէ, քանի որ մենք պետք է շարունակենք երկխոսել Ադրբեջանի հետ։ Դրանք հակաարդյունավետ կլինեն և թույլ չեն տա լավագույնս պաշտպանել հայկական տարածքը և դրա բնակիչներին»,- ասել էր Ֆրանսիայի նախագահը։
Էմմա Չոբանյան
