18.12.2025 | 23:24
ՀՀ տարածքում ավտոճանապարհները հիմնականում անցանելի են
Թեհրանը հետամուտ է տրանսպորտային կապերի զարգացմանը, սակայն դեմ է միջազգային և աշխարհաքաղաքական սահմանների փոփոխությանը․ Իրանի ԱԳՆ
Քաղաքականություն
02.10.2023 | 14:11
Իրանի ԱԳՆ խոսնակ Նասեր Քանանին այսօրվա ճեպազրույցում անդրադարձել է նաև ՀՀ Անվտանգության խորհրդի քարտուղար Արմեն Գրիգորյանի՝ Իրան կատարած վերջին այցին և նշել, որ այս այցը տեղի է ունեցել երկու հարևան երկրների միջև բանակցությունների և շփումների շարունակականությանը համահունչ՝ վերանայելու երկկողմ հարաբերությունները և զարգացումները կովկասյան տարածաշրջանում, փոխանցում է IRNA գործակալությունը։
Նա նշել է, որ Իրանը կարևորում է Կովկասում և ամբողջ տարածաշրջանում իրավիճակը, և հայ պաշտոնյայի այցն Իրան կայացել է այդ պայմանները քննարկելու նպատակով։ Քանանին նաև ընդգծել է, որ Իրանը դեմ է միջազգային և աշխարհաքաղաքական սահմանների ցանկացած փոփոխության։ Ըստ նրա՝ Իսլամական Հանրապետությունը հետամուտ է տրանսպորտային ցանցերի զարգացմանը, որը կապահովի տարածաշրջանի բոլոր երկրների շահերը, սակայն երկիրը դեմ է միջազգային սահմանների փոփոխությանը։
Լեռնային Ղարաբաղի տարածաշրջանի վերաբերյալ Քանանին ասել է, որ «Իրանն աջակցում է այս օկուպացված շրջանի ամբողջական վերադարձին Ադրբեջանին»։
Պատասխանելով Արցախից բռնի տեղահանված հայերին մարդասիրական օգնություն տրամադրելու՝ Իրանի ծրագրի մասին հարցին՝ Քանանին պատասխանել է, որ նման ծրագրի մանրամասները կհրապարակի Իրանի Կարմիր մահիկի ընկերակցությունը։
Էմմա Չոբանյան
