Քաղաքականություն
18.09.2023 | 15:44
Ուկրաինայի Պաշտպանության նախարարության հետախուզության գլխավոր վարչության ղեկավար Կիրիլ Բուդանովը բրիտանական Economist-ին տված հարցազրույցում ասել է, որ Ռուսաստանի վրա անօդաչու թռչող սարքերի հարձակումների ալիքը երեք հիմնական նպատակ ունի՝ սպառել ռուսական հակաօդային պաշտպանության համակարգերը, շարքից հանել ռազմական տրանսպորտն ու ռմբակոծիչները, վնասել ռազմական արտադրական օբյեկտները, փոխանցում է BBC-ի ռուսական ծառայությունը։
Բացի այդ, ըստ նրա՝ անօդաչուներով հարվածները նաև հոգեբանական նպատակ ունեն։
«Բնակչության մեջ անհանգստություն սերմանել և Ռուսաստանում տնտեսական գործընթացները խաթարել։ Սանկտ Պետերբուրգի և Մոսկվայի խոշոր օդանավակայանների փակումը, օրինակ, գրեթե ամենօրյա երևույթ է դարձել»,- ասել է Բուդանովը։
Նա հավելել է որ ռուսական տարածքին հարվածներն Ուկրաինային ագրեսոր չեն դարձնում, քանի որ Կիևը պատերազմի կանոնները չի խախտում։
«Ոչ ոք չի համարում, որ Մեծ Բրիտանիան կամ ԱՄՆ-ն ագրեսոր են եղել Երկրորդ համաշխարհային պատերազմում, չնայած նրանք ռմբակոծել են Գերմանիայի տարածքը»,- նշել է ուկրաինացի պաշտոնյան։
Խոսելով ուկրաինական հակահարձակման տեմպերից՝ Բուդանովն ասել է, որ Ռուսաստա՛նը պետք է անհանգստանա, ոչ թե Ուկրաինան։
«Զապորոժիեի հարավային ամենակարևոր առանցքի առաջին պաշտպանական գիծը որոշ տեղերում արդեն ճեղքվել է, ինչը նշանակում է, որ Ռուսաստանի և Ղրիմի միջև ցամաքային ուղիները կտրելու գործողությունը կարող է իրականացվել նույնիսկ մինչև ձմռան սկսվելը»,- պարզաբանել է Բուդանովը:
Նա պնդում է, որ Ռուսաստանն արդեն տեղակայել է լրացուցիչ ռեզերվներ, որոնք չէր նախատեսում տեղակայել մինչև հոկտեմբերի վերջ։ Բուդանովը նաև հայտնել է, որ Ուկրաինան պատասխան է պատրաստում ձմռանը ուկրաինական ենթակառուցվածքների վրա ռուսական հնարավոր նոր հարձակումներին։
«Թող սկսեն։ Նրանք ևս պատասխան կստանան»,- հայտարարել է Բուդանովը։
Էմմա Չոբանյան
