19.12.2025 | 20:28
Ֆինանսական գրագիտության թեմաները ներառված են մի շարք դպրոցական առարկաների ծրագրերում. ԿԳՄՍ նախարար
Լիբիայում ջրհեղեղն ավելի քան 5,300 մարդու կյանք է խլել
Քաղաքականություն
13.09.2023 | 17:18
Լիբիայի Դերնա նավահանգստային քաղաքում ջրհեղեղի զոհերի թիվը կարող է գերազանցել 5,300-ը, նման տվյալներ է ներկայացրել Բենղազիի կողմից վերահսկվող Լիբիայի արևելյան շրջանների Ներքին գործերի նախարարության ներկայացուցիչը, գրում է Euronews-ը։
«Դանիել» փոթորկի հետևանքով առաջացած հորդառատ անձրևները լցրել են չոր սեզոնային գետերի հուները: Երկու ամբարտակներ ճեղքվել են, կամուրջներ են ավերվել, հեղեղը 100 հազար բնակչություն ունեցող քաղաքի ամբողջ թաղամասեր է տարել, շատ բնակիչների ծովն է քշել։
Փրկարարներին միշտ չէ, որ հաջողվում է ջրով հեղեղված ճանապարհներով հասնել տուժած շրջաններ։ Շատ տեղացիներ ստիպված են ձեռքով դուրս բերել մահացածների մարմինները ջրից ու ցեխից։
«Ցավոք, մերոնց կեսը խեղդվել է, գուցե նաև 90%-ը։ Իմ մորաքրոջ տունն անցել է ջրի տակ, մյուս մորաքրոջս ընտանքիը ևս զոհվել է, զարմիկիս ընտանիքը՝ նույնպես։ Սա ցեղասպանություն է»,- պատմել է բնակիչներից մեկը։
«Մենք զանգվածաբար թաղում ենք մարդկանց։ Հարևան Շիխա շրջանի հիվանդանոցը լի է մարմիններով, երեկ դրանց թիվը շուրջ հազար էր, զոհվածների թվում էին կանայք, երեխաներ, տղամարդիկ, ծերեր»,- պատմել է մեկ այլ բնակիչ։
Կարմիր Խաչը հաստատել է, որ անհետ կորածների թիվը ներկայում հասնում է 10 հազարի։ Ավելի քան 40 հազար տեղի բնակիչներ ստիպված են եղել լքել իրենց տները։
Օգնությունը Դերնա է սկսել հասնել միայն երեքշաբթի: Տրիպոլիի կառավարությունը մարդասիրական օգնության շարասյուններ է ուղարկել դեպի արևելք: Տարածաշրջան են ժամանել որոնողափրկարարական խմբեր Թուրքիայից, ԱՄԷ-ից և Եգիպտոսից։ Ֆրանսիան հայտարարել է տուժած շրջանում դաշտային հոսպիտալի տեղակայման մասին։
