Հիմա ում է ծաղրելու «Ցեցը»․ Հայաստանում կոմիքսների առաջին գիրքն արդեն վաճառքում է. ՏԵՍԱՆՅՈՒԹ

Երբ ցեցն ընկնում է իշխանության մեջ, այն արագ քայքայվում է և ապամոնտաժվում։ Հայաստանում տեղի ունեցած թավշյա հեղափոխությունը նախ և առաջ մտքի հեղափոխություն էր, որում ուրույն դրակատարություն ունեցան նաև «Մեդիալաբ»-ի քաղաքական ծաղրանկարները և լրատվամիջոցի «Ցեց» երգիծաթերթը։ Եվ եթե նախորդ իշխանության օրոք «Մեդիալաբ»-ին ամենաշատը հարցնում էին՝ «Բա չեք վախենու՞մ», նոր իշխանության օրոք արդեն հարցնում են՝ «Հիմա ու՞մ եք նկարելու»։

«Անդրադառնալու ենք բոլորին, ինչպես միշտ, մեր գործունեության մեջ ոչինչ չի փոխվի»,- վստահեցնում է «Մեդիալաբ»-ի խմբագիր Մարիաննա Գրիգորյանը՝ ներկայացնելով Հայաստանում կոմիքսների առաջին գիրքը։ Երեք տարի քաղաքական ծաղրանկարի մշակույթը Հայաստանում ակտիվացնելուց հետո «Մեդիալաբ»-ի թիմը որոշեց հանրությանը հուզող թեմաներին անդրադառնալ ամբողջական պատմությունների տեսքով։ Կոմիքսներն արտացոլում են մեր կյանքի տարբեր ոլորտներում առկա խնդիրները։ Գիրքը կազմվել է վեց ամսվա ընթացքում։ Այնտեղ ներկայացված է 16 պատմություն, մի մասը՝ իրական, մյուս մասը՝ հորինովի։

Կոմիքսների նկարիչներն են Վահե Ներսեսյանն ու Տիգրան Մանգասարյանը։ Իրավապաշտպան Ավետիք Իշխանյանը նկատում է՝ «Մեդիալաբ»-ը Հայաստանում վերածնեց քաղաքական երգիծանքի մշակույթը։ Իրավապաշտպան Արթուր Սաքունցն էլ անակնկալի է եկել, երբ ստացել է գրքի նախաբանը գրելու առաջարկը, սակայն սիրով է ընդունել այն։ Նա նշում է՝ «Մեդիալաբ»-ն առաջնորդվում է ոչ թե կոմֆորմիզմի, այլ ճշմարտությունը վեր հանելու տրամաբանությամբ։

Հայաստանում առաջին կոմիքսների գրքի շնորհանդեսին ներկա էր նաև մեր երկրում ԵՄ պատվիրակության ղեկավար, դեսպան Պյոտր Սվիտալսկին։ Նրա խոսքով՝ կոմիքսները նպաստում են քաղաքական բանավեճին և առողջ երկխոսություն ծավալելուն։ Դեսպանը հպարտ է, որ ակամայից դարձել է կոմիքսներից մեկի հերոսը։ Շնորհանդեսին ներկա էր նաև Հայաստանում Ամերիկայի Միացյալ Նահանգների արտակարգ և լիազոր դեսպան Ռիչարդ Միլսը։ Նա ընդգծում է, որ «Մեդիալաբ»-ի քաղաքական ծաղրանկարները մշտապես եղել են հանրային տրամադրությունների լավագույն արտացոլումը։

Մանրամասները՝ տեսանյութում։

Աննա Բաբաջանյան