16.09.2026 | 00:14
Կռվախնձոր դարձած դուռն ու արտահերթ ընտրությունների նախերգանքը․ Գյումրիի ավագանու նիստը լարվեց. ՏԵՍԱՆՅՈՒԹ
Արայիկ Հարությունյանը ներկայացրել է Տեսչական մարմինների աշխատանքների համակարգման նորանշանակ ղեկավարին
Քաղաքականություն
23.08.2023 | 15:05
Վարչապետի աշխատակազմի ղեկավար Արայիկ Հարությունյանը Վարչապետի աշխատակազմի Տեսչական մարմինների աշխատանքների համակարգման գրասենյակի աշխատակազմին է ներկայացրել նորանշանակ ղեկավարին՝ Պետրոս Մարտիրոսյանին․ տեղեկացնում են ՀՀ կառավարությունից։
Արայիկ Հարությունյանը նախ շնորհակալություն է հայտնել Տեսչական մարմինների աշխատանքների համակարգման գրասենյակի տեղակալ Արման Դանիելյանին վերջին ամիսներին աշխատանքները համակարգելու համար և շնորհավորել նորանշանակ ղեկավարին:
«Մենք երկար քննարկումներից հետո որոշում ենք կայացրել պարոն Մարտիրոսյանին նշանակել Տեսչական մարմինների աշխատանքների համակարգման գրասենյակի ղեկավար: Քննարկումները երկար էին, որովհետև մեզ անհրաժեշտ էր կայացնել այնպիսի որոշում, որի արդյունքում կկարողանանք լուծել այն խնդիրները, որոնք իրականում այսօր քիչ չեն տեսչականների ուղղությամբ: Իհարկե, գրասենյակը, հատկապես վերջին ամիսներին բավականին աշխատանք է կատարել, բայց կարծում եմ՝ տեմպերն ավելացնելու և արդեն լուծումներ տալու խնդիր ունենք: Նախ մինչև այդ, պարոն Դանիելյան, Ձեզ եմ ուզում շնորհակալություն հայտնել այս ամիսներին բավականին մեծ աշխատանք կատարելու և գրասենյակը համակարգելու համար: Վստահ եմ, որ պարոն Մարտիրոսյանի հետ Ձեր կարողությունների և հնարավորությունների համընկնումը շատ լուրջ հնարավորություն կտա, որպեսզի տեսչական մարմինը ճիշտ ուղղությամբ աշխատանքներ իրականացնի:
Պարոն Մարտիրոսյան, շնորհավորում եմ Ձեզ նշանակման առիթով: Վստահ եմ՝ այն խնդիրները, որոնք արդեն քննարկել ենք և Ձեր առջև դրվել են, առաջիկայում լուծումներ կստանան: Ձեր մեծ փորձը, այն ոլորտում, որտեղից գալիս եք՝ Գլխավոր դատախազությունից, և այն ուղղությունները, որոնք համակարգել եք, թույլ կտան նաև այստեղ կուտակված կարողությունների համադրմամբ լուրջ առաջընթաց ունենալ՝ տեսչական մարմինների համակարգման, լիազորությունների մեծացման, գործիքների ավելացման ուղղությամբ: Վստահ եմ, որ այն կամային հատկանիշները, որոնք ունեք և դրսևորել եք ձեր ոլորտում, այստեղ վստահաբար շատ պետքական են, և որոշումը, որը կայացրել ենք, նաև պայմանավորած է դրանով», – ասել է Վարչապետի աշխատակազմի ղեկավարը:
