Հասարակություն
14.08.2023 | 18:45Երևանի քաղաքապետարանն անվավեր է ճանաչել Թումանյան 39 հասցեի բազմաբնակարան շենքում մանսարդային հարկ կառուցելու շինթույլտվությունը, որը ժամանակին տրամադրվել է օրենքի խախտմամբ։
Թումանյան 39 հասցեում գտնվող 5 հարկանի շենքի տանիքին վերնահարկի կառուցման մասին ահազանգել էր Factor TV-ն: Մեր ահազանգից հետո քաղաքապետարանից հայտնել էին, որ Երևանի փոխքաղաքապետ Տիգրան Ավինյանը դիտել է տեսանյութը և պատրաստվում է հանդիպել վերնահարկի կառուցումից դժգոհող բնակիչների հետ։ Այսօր քաղաքապետարանի գործակարգավարական նիստին Ավինյանը նշեց, որ մանսարդային հարկ կառուցելու համար շենքում ապրող մարդիկ պետք է իրենց համաձայնությունը տային համապատասխան կարգով, ինչը չի պահպանվել։
Թումանյան 39 հասցեի բնակիչները Factor TV-ին պատմել էին, որ ստորագրությամբ տվել են իրենց համաձայնությունը շենքի տանիքին վերնահարկ կառուցելու համար, սակայն չեն իմացել, թե ինչպիսի վերնահարկի մասին է խոսքը։
Տիգրան Ավինյանն այսօր հայտարարել է, որ նախկինում տրված շինթույլտվությունների հետ կապված խնդիրներ կան նաև Ֆիզգորոդոկում, Աջափնյակում։
Քաղաքապետի մամուլի խոսնակ Հայկ Կոստանյանը Factor TV-ին փոխանցեց, որ քաղաքապետարանը գրություն է ներկայացնելու Թումանյան 39 հասցեի կառուցապատողին, որ նախկինում տրված շինթույլտվությունն անվավեր է ճանաչվել, ինչպես նաև դիմելու են Կենտրոն վարչական շրջանին և Կենտրոն համատիրությանը՝ քանդման աշխատանքներ սկսելու համար։ Խոսնակը նշեց, որ այս պահին շինարարական աշխատանքները դադարեցված են։
Factor TV-ն արձանագրել էր, որ մեկ այլ նման մանսարդային հարկ էլ կառուցվել է Արամի 60 հասցեում՝ Եղիշե Չարենցի տուն-թանգարանի շենքի տանիքին։ Թեև մեր ահազանգից հետո քաղաքապետարանից հայտնել էին, որ այն ապօրինի է և պետք է ապամոնտաժվի, սակայն մինչև այսօր մանսարդային հարկը ապամոնտաժված չէ։
Մանրամասները՝ տեսանյութում։
Անի Թամրազյան
