24.11.2024 | 11:12
Ռուբլու փոխարժեքը շարունակում է իջնել
Նույնիսկ չգիտեմ` հայրս հիմա ո՞ղջ է, թե՞ ոչ. առևանգված Վագիֆ Խաչատրյանի դուստր
31.07.2023 | 12:07
«Իմ հայրը հանցագործ չէ, ապրել է արժանապատիվ կյանքով, և ոչ մեկն իրավասու չէ նրան հանցագործ անվանելու։ Ես պահանջում եմ վերադարձնել իմ հայրիկին»,- այս մասին ՄԱԿ-ի գրասենյակի դիմաց բողոքի ակցիա իրականացնելու ժամանակ լրագրողների հետ զրույցում ասաց Արցախից առևանգված Վագիֆ Խաչատրյանի դուստրը՝ Վերա Խաչատրյանը՝ հերքելով հոր մասին շրջանառվող մի շարք տեղեկություններ:
«Հայրս շատ վատ առողջական վիճակում էր, պետք է բաց վիրահատություն տաներ, ես նույնիսկ հիմա չգիտեմ՝ նա ողջ է, սիրտը դիմացել է, թե ոչ»,- ասաց նա:
Հիշեցնենք, որ շաբաթ օրը Ադրբեջանը Լաչինի միջանցքում առևանգել է բուժման նպատակով Հայաստան տեղափոխվող արցախցի Վագիֆ Խաչատրյանին:
Վերջինիս իրավունքների պաշտպանության վերաբերյալ դիմում է ներկայացվել Մարդու իրավունքների եվրոպական դատարան՝ Ադրբեջանի նկատմամբ միջանկյալ միջոց կիրառելու պահանջով: Այս մասին հայտնել է միջազգային իրավական հարցերով ՀՀ ներկայացուցիչ Եղիշե Կիրակոսյանը։
Նախօրեին Ադրբեջանի գլխավոր դատախազությունը հայտնել էր Վագիֆ Խաչատրյանին կալանավորելու մասին։ Ադրբեջանի գլխավոր դատախազությունը նշել է, որ Խաչատրյանը «միջազգային հետախուզման մեջ է»։
Ըստ Բաքվի՝ «օգտագործելով տարբեր տեսակի զենքեր՝ նա տարբեր անձանց հետ 1991 թ․ դեկտեմբերի 22-ին կազմակերպել և Մեշալի գյուղի ադրբեջանցիների դեմ իրականացրել է հանցագործություններ, ոչնչացրել է նրանց պատկանող գույքը, պետությանը խոշոր չափի վնաս է հասցրել։
Հայաստանի մարդու իրավունքների պաշտպան Անահիտ Մանասյանը հայտարարել է, որ Վագիֆ Խաչատրյանի նկատմամբ առկա չէ միջազգային հետախուզում։ Ըստ ՀՀ ՄԻՊ-ի՝ քաղաքացու իրավունքներին ոչ իրավաչափ միջամտությունը տեղի է ունենում միջազգային-իրավական երաշխիքների և չափանիշների խախտմամբ։
Մանրամասները՝ տեսանյութում։
