Ընտանիքների անապահովության գնահատման համակարգն արդյունավետ չէ. Կարեն Կարապետյան

ՀՀ Կառավարության այսօրվա նիստը, ինչպես միշտ, մեկնարկեց վարչապետ Կարեն Կարապետյանի հանձնարարականներով:

Կառավարության ղեկավարը հայտարարեց՝ ներկայում գործող ընտանիքների անապահովության գնահատման համակարգի կիրառման ուսումնասիրությունից պարզ է դարձել, որ այն հասցեականության և հստակության տեսանկյունից բավարար արդյունավետ չէ:

«Ինչը հիմնականում պայմանավորված է  համակարգում անհրաժեշտ տեղեկատվության բացակայությամբ: Առկա իրավիճակի կանոնակարգման նպատակով անհրաժեշտ ենք համարում անապահովության գնահատման գործընթացում ուսումնասիրել և հաշվի առնել նաև համապատասխան մարդկանց բանկային գործարքների, ինչպես նաև գույքային իրավունքների հետ կապված ամբողջական տեղեկությունները»,- նշեց Կարապետյանը:

Գործադիրի ղեկավարը, հաշվի առնելով վերոնշյալը, ՀՀ աշխատանքի և սոցիալական հարցերի նախարարին, ԿԲ նախագահին հանձնարարեց մեկամսյա ժամկետում համատեղ քննարկել ընտանիքների անապահովության գնահատման համակարգում հաշվառված անձանց բանկային գործարքների մասին տեղեկատվություն տրամադրելու հնարավորությունը և կառավարության աշխատակազմ ներկայացնել առաջարկությունները:

«Երկրորդը՝ Տարածքային կառավարման և զարգացման նախարարին, մարզպետներին, Անշարժ գույքի կադաստրի պետական կոմիտեի նախագահին ու նաև  Երևանի քաղաքապետին ենք առաջարկում՝ երկամսյա ժամկետում ամփոփել և արդիականացնել Կադաստրի տեղեկատվական շտեմարանում առկա անձանց տվյալները և ապահովել դրանց  ամբողջական տրամադրումը ՀՀ աշխատանքի և սոցիալական հարցրերի նախարարությանը՝ անապահովության գնահատման գործընթացում կիրառելու նպատակով»,- եզրափակեց Կարեն Կարապետյանը:

Շողիկ Գալստյան