Այդ ձայնագրությունը օրիգինալ է, չէինք հրապարակում, որովհետև հեռախոսը քննչականում էր, վրան` գաղտնաբառ․ ՏԵՍԱՆՅՈՒԹ

Վաղը՝ հուլիսի 19-ին, լրանում է 15 զինվորի կյանք խլած Ազատ գյուղի ողբերգության կես տարին: Հրդեհի գործով քննիչի հետ հանդիպման նպատակով Քննչական կոմիտեի ԶՔԳ վարչություն եկած ծնողներից Գաբրիել Կիրակոսյանը լրագրողների հետ զրույցում ասաց, որ իրավապահները չեն աշխատում, սակայն շարունակում են ամեն ինչ անել, որպեսզի ապացուցվի դեպքից ժամեր անց Նիկոլ Փաշինյանի ներկայացրած վարկածը:

«Փորձագիտական կենտրոն տանելու համար պետք է Վարդենիսից նմուշներ բերվեն, ում ասում ես՝ գցում են մյուսի վրա։ Բացահայտելու ուղղությամբ չեք աշխատում, գոնե դրա ասած վարկածն առաջ քաշելու ուղղությամբ գործը տարեք, ապացուցեք: Վարչապետի հետ հանդիպման ժամանակ ծնողներից մեկն ասաց՝ գործը բացահայտելո՞ւ եք, պատասխանեց՝ արդեն բացահայտել ենք։ Մարդն ինչքան սրբապիղծ պետք է լինի, որ գործը քնացնի, հայտարարություն անի՝ արդեն բացահայտված է։ Իրենք փորձում են ամեն ինչ տանել պաշտոնական վարկածով։ Եթե ինչ-որ բան էլ իրենց դիմաց ենք դնում, փորձում են շեղել։ Ինչո՞ւ մեր ասած մարդկանց չեն հարցաքննում, որովհետեւ իրենք կարող են հակառա՞կը խոսել»,- ընդգծեց զոհվածի հայրը:

Անդրադառնալով շուրջ 20 օր առաջ հրապարակած ձայնագրությանը, որում զինվորներից մեկն ասում է, թե հրդեհ է, ողջ զինվոր չի մնացել, Կիրակոսյանն ասաց, որ այն մոնտաժված կամ կեղծ չէ, սակայն այս ամիսների ընթացքում չէին հրապարակում, քանի որ հեռախոսը, որի մեջ ձայնագրությունն է, քննիչի մոտ էր. վերջինս գաղտնաբառը բացել չկարողանալուց հետո վերադարձրել է հեռախոսը:

Մամրամասները՝ տեսանյութում:

Արփի Հակոբյան