Կարգավորումները պետք է լինեն այն երկրի ինքնիշխանության և իրավազորության ներքո, որով անցնում են․ դա շատ կարևոր համաձայնություն է․ Մհեր Գրիգորյան․ ՏԵՍԱՆՅՈՒԹ

Հայաստանի փոխվարչապետ Մհեր Գրիգորյանը ադրբեջանցի իր պաշտոնակից Շահին Մուստաֆաևին առաջարկ է ուղարկել՝ անցկացնել Հայաստանի և Ադրբեջանի միջև սահմանազատման հարցերով հանձնաժողովների հանդիպում։ «Ադրբեջանի փոխվարչապետի պատասխանը դրական է»,- այս մասին այսօր լրագրողների հետ ճեպազրույցում նշեց Մհեր Գրիգորյանը՝ խոսելով հանդիպման իր առաջարկի մասին։

«Հանդիպման վայրի և ամսաթվի և ժամի մասին պայմանավորվածություն դեռևս չունենք, բայց ենթադրում եմ՝ մոտ ժամանակներում կունենանք»,- նշեց փոխվարչապետը։

«Միանշանակ է, որ Հայաստանի տարածքով անցնող երթուղիները վերահսկվելու են համաձայն Հայաստանի օրենասդրության»- ընդգծեց Մհեր Գրիգորյանը:

Հարցին, թե այդ դեպքում ինչու է ռուսական ФСБ-ն կանգնելու այդ ճանապարհին, փոխվարչապետն արձագանքեց. «Իսկ ձեզ ո՞վ է ասել, որ ФСБ-ն կանգնելու է: Նախ, եկեք խոսենք ФСБ-ի կազմում գործող սահմանապահ զորքերի մասին, որպեսզի հստակ լինենք, թե ինչի մասին է խոսքը, եթե դուք մեջբերում եք նոյեմբերի 9-ի հայտարարության 9-րդ կետը: Երկրորդ, գործառույթի իրականացման ձեւի մասով դեռևս քննարկումներ պետք է լինեն»:

Գրիգորյանի հավաստմամբ՝ մի կարևոր կոնսենսուս կա առ այն, որ ապաշրջափակման գործընթացը սկսվում է Երասխ-Հորադիզ երկաթգծի վերաշահագործումից․ «Ինչը, կարծում եմ, կարևոր է, որովհետև կոնկրետ է և հասկանալի, թե ինչի մասին է խոսակցոթյունը։ Խոսակցությունը երկաթգծի մասին է։ Եվ կա վերջնական ընկալում, որ կարգավորումները պետք է լինեն այն երկրների ինքնիշխանության և իրավազորության ներքո, որոնց տարածքով երկաթգիծն անցնելու է․ դա շատ կարևոր համաձայնություն է։

Անդրադառնալով  հարցին՝ Բաքուն համաձայնե՞լ է իրավազորության հետ կապված այդ մոտեցմանը, փոխվարչապետը պատասխանեց. «Կարծում եմ՝ այո, որովհետեւ մենք բազմիցս հայտարարել ենք, որ այդ հարցը որեւէ այլ ձեւաչափով չենք քննարկելու: Եվ եթե այնուամենայնիվ, կան քննարկումներ, հանդիպումներ, նշանակում է՝ այդ ընկալումը կիսում են առնվազն մեր եռակողմ աշխատանքային խմբի հարթակի բոլոր մասնակիցները»:

Մանրամասները՝ տեսանյութում։