18.03.2026 | 15:21
Լարիջանիի սպանությունը չի ապակայունացնի Իրանի քաղաքական համակարգը. Արաղչի
Մեսրոպ Մակյանը, ամենայն հավանականությամբ, կնշանակվի Վերաքննիչ հակակոռուցիոն դատարանի նախագահ
16.06.2023 | 18:49
Բարձրագույն դատական խորհրդի կայքում այսօր հրապարակվել է Խորհրդի անդամ Մեսրոպ Մակյանի լիազորությունները դադարելու վերաբերյալ որոշում։ Ըստ որոշման՝ դատավոր Մակյանը հրաժարականի դիմում է ներկայացրել։
Իրավապահ համակարգում շրջանառվող լուրերի համաձայն՝ քննարկվում է Մակյանին Վերաքննիչ հակակոռուպցիոն դատարանի նախագահ նշանակելու հարցը, և հրաժարականի դիմում ներկայացնելու պատճառն այդ է։ Փորձեցինք տեղեկությունը ճշտել հենց դատավոր Մակյանից, սակայն նրա հետ մեզ կապ հաստատել չհաջողվեց։
Նշենք, որ մինչև հունիսի 15-ը Վերաքննիչ դատարանում կոռուպցիոն բնույթի գործերը քննում էին առանձին դատավորներ, սակայն հունիսի 15-ից, այսինքն՝ երեկվանից, արդեն գործում է Վերաքննիչ հակակոռուպցիոն դատարանը։
Նշենք, որ Բարձրագույն դատական խորհրդի դատավոր անդամն ընտրվում է Դատավորների ընդհանուր ժողովի կողմից։ Ընդհանուր ժողովի կողմից ընտրված Բարձրագույն դատական խորհրդի անդամը չի կարող լինել դատարանի նախագահ կամ Վճռաբեկ դատարանի պալատի նախագահ։ Ընդհանուր ժողովի կողմից որպես Բարձրագույն դատական խորհրդի անդամ դատարանի նախագահի կամ Վճռաբեկ դատարանի պալատի նախագահի ընտրվելու դեպքում նրա՝ որպես դատարանի նախագահի կամ Վճռաբեկ դատարանի պալատի նախագահի լիազորությունները դադարում են: Այսինքն՝ եթե Մակյանն ընտրվի Վերաքննիչ հակակոռուպցիոն դատարանի նախագահ, նրա լիազորությունները, օրենքի ուժով ենթակա կլինեն դադարեցման։
Արաքս Մամուլյան
