26.11.2024 | 10:49
Լարսը փակ է բեռնատարների համար
Բայրամովը ԵԱՀԿ նիստում Հայաստանին մեղադրել է «Ղարաբաղի հայերի հետ երկխոսությանը խոչընդոտելու համար»
Քաղաքականություն
07.06.2023 | 11:55
Ադրբեջանի ԱԳ նախարար Ջեյհուն Բայրամովը Ավստրիայում ԵԱՀԿ Մշտական խորհրդի հատուկ նիստում ելույթ է ունեցել և կրկին մեղադրանքներ հնչեցրել Հայաստանի հասցեին։ Նա նշել է, որ Բաքուն Երևանից քաղաքական կամք է ակնկալում տարաձայնությունների վերացման համար երեք ուղղություններով, որոնք կազմում են խաղաղության պայմանագրի շուրջ երկկողմ քննարկումների օրակարգը։
«Խաղաղության պայմանագրի տեքստի շուրջ բանակցությունները տեղի են ունենում Ադրբեջանի և Հայաստանի միջև հարաբերությունների կարգավորման գործընթացի շրջանակներում։ Վերջին շաբաթներին Վաշինգտոնում, Բրյուսելում, Մոսկվայում և Քիշնևում կայացած բանակցությունները հնարավորություն են տվել ավելի լավ հասկանալ կողմերի դիրքորոշումները։ Ադրբեջանն ակնկալում է, որ Հայաստանը քաղաքական կամք կցուցաբերի՝ լուծելու տարաձայնությունները երեք կոնկրետ ոլորտներում»,-ասել է Բայրամովը։
Նա պնդել է, թե Հայաստանն Արցախում ունի ռազմական ներկայություն, շարունակում է «հետևողականորեն միջամտել Ադրբեջանի ներքին գործերին ու խանգարել Ադրբեջանի կենտրոնական իշխանությունների և Ղարաբաղում հայկական ծագում ունեցող տեղի բնակիչների միջև երկխոսությանը և միջազգային մակարդակով, այդ թվում՝ ԵԱՀԿ շրջանակներում սևացման արշավ է իրականացնում Բաքվի դեմ»։
Բայրամովը նշել է, որ այս ամենը «բանակցությունների ճանապարհին գլխավոր խոչընդոտն են»։ Նա հայտարարել է, որ Բաքուն վճռական է տրամադրված «Ադրբեջանի քաղաքական, իրավական, տնտեսական և սոցիալական տարածք Ղարաբաղի էթնիկ հայերի վերաինտեգրման հարցում որպես հավասար քաղաքացիների»։
Էմմա Չոբանյան
