Ալիևին պատասխանողը ես չեմ, իմ տիրույթում չէ. Գնել Սանոսյան․ ՏԵՍԱՆՅՈՒԹ

«Կարծում եմ՝ բոլորիս համար կարեւոր է, թե որ երկիրը բանակցությունների սեղանի շուրջ ինչ է խոսում, ինչ դիրքորոշում է արտահայտում: Թե մեր կողմն ինչ է խոսում, բավական պարզ բազմաթիվ անգամ երկրի ղեկավարի կամ ԱԳ նախարարի կողմից լսել ենք»,- նշեց նախարարը:

Պատասխանելով անկլավների վերաբերյալ հարցին Սանոսյանը նշեց․ «Բանակցություններում անկլավների հետ կապված տարբեր քննարկումներ և սցենարներ կան։ Ակնհայտ է, որ երբ այդ պրոցեսը հասունանա, կարևոր դերակատարում կունենան այդտեղ իրավական փաստաթղթերը։ Այսինքն` որևէ տարածք, որևէ կարգավիճակ ունենալու համար գոյություն ունեն իրավական հիմքեր։ Կարծում եմ` այդ ժամանակ գործընկերները կտեսնեն` որ տարածքը ինչ իրավական հիմք ունի»:

Նախարարի դիտարկմամբ՝ ակնհայտ է, որ անկլավային տարածքներ ունեն թե՛ ադրբեջանական, թե՛ հայկական կողմերը։ «1990–ականների պատերազմից հետո հատկապես Տավուշի մարզում ունենք տարածքները, որոնք գտնվում են հիմա Ադրբեջանի տիրապետության տակ։ Կարծում եմ` այդ ամենը մեկ ընդհանուր փաթեթի մեջ կդիտարկվի»։
Սանոսյանն ընդգծեց, որ համաձայն չէ այն դիտարկման հետ, թե անկլավները հանձնվում են. «Հանձնելն ու փոխանակելը տարբեր բաներ են»։

Ինչ վերաբերում է նրան, որ վիճահարույց տարածքները Ադրբեջանին վերադարձնելու դեպքում հնարավոր է պետական նշանակության ճանապարհներ հայտնվեն թշնամու վերահսկողության տակ` Սանոսյանը նշեց, որ բոլոր սցենարների դեպքում պետք է գտնեն լուծումներ և ինչպես Սյունիքում գտան լուծումներ` փոխարինող ճանապարհներով, այս դեպքում էլ ելքեր կմտածեն։ Նախարարը հորդորեց դեպքերից առաջ չընկնել և համբերել։