Քաղաքականություն
24.05.2023 | 19:31ԱԺ «Քաղաքացիական պայմանագիր» խմբակցության պատգամավոր Լիլիթ Ստեփանյանն Ազգային ժողով-Կառավարություն հարցուպատասխանի ժամանակ ԱԳ նախարարից հետաքրքրվեց վերջերս ԱԳՆ-ում Մեծ Բրիտանիայի և Հյուսիսային Իռլանդիայի հարցերով ներկայացուցչի հետ հանդիպման արդյունքներից և թե ինչ հարցերի շուրջ է Հայաստանը համաձայնության հասել Ադրբեջանի հետ:
«Խաղաղության պայամանագրի տեքստում չկան երկրորդական կամ անկարևոր հարցեր. մի մասը կենսական հարցերին է վերաբերում, մյուսը՝ ածանցյալ պայմանավորվածություններին: Երկրորդ խմբի մասով Ադրբեջանի հետ փոխըմբռնման գալն ավելի հեշտ է: Ամենակենսական հարցերին վերաբերող խնդիրներում կողմերը բավական հեռու են համաձայնության գալուց»,- պատասխանեց Արարատ Միրզոյանը:
ԱԳ նախարարը նշեց, որ մինչ այսօր եղած բանակցությունների արդյունքները զգուշավոր լավատեսության հիմք են տալիս:
«Հայաստանի և Ադրբեջանի ղեկավարները միջազգային դերակատարների ներկայությամբ պայմանավորվել են, որ փոխադարձաբար ճանաչում են միմյանց տարածքային ամբողջականությունը»,- ընդգծեց Միրզոյանը:
ՀՀ արտգործնախարարը ևս մեկ անգամ վերահաստատել է երկրի վարչապետի խոսքը՝ ՀՀ սահմանների ու դրանց ճանաչման հարցում առավել որոշակիությունը Հայաստանի կարմիր գիծն է:
«Եթե ԼՂ ժողովրդին գլխին շարունակի կախված մնալ էթնիկ զտման վտանգը, իրատեսական չէ, որ ՀՀ-ն կկարողանա վերջնականորեն կարգավորել հարաբերություններն Ադրբեջանի հետ և Հարավային Կովկասում երկարատև խաղաղություն հաստատել»,- նշեց Միրզոյանը՝ հավելելով, որ այդ ուղղություններով բանակցությունները շարունակվում են։
Մանրամասները՝ տեսանյութում։
