19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
Վիրավորներից 2-ի վիճակը միջին ծանրության է, երկուսինը` բավարար. Անահիտ Ավանեսյան․ ՏԵՍԱՆՅՈՒԹ
11.05.2023 | 13:29
Ունենք 4 վիրավոր, 2-ի վիճակը միջին ծանրության է, 2-ինը՝ բավարար, վնասվածքները բեկորային են: Վիրավորները Երևանում չեն, և եթե կարիք լինի, կիրականացվի տեղափոխություն: Այդ մասին Կառավարության ճեպազրույցի ժամանակ տեղեկացրեց առողջապահության նախարար Անահիտ Ավանեսյանը՝ նշելով, որ նրանց կյանքին վտանգ չի սպառնում:
Հիշեցնենք՝ այսօր՝ ժամը 06:00-ից, Ադրբեջանի ԶՈՒ ստորաբաժանումները հրետանային և ականանետային միջոցներից կրակ են բացել ՀՀ Գեղարքունիքի մարզի Սոթք բնակավայրի ուղղությամբ տեղակայված մարտական դիրքերի ուղղությամբ։
Ադրբեջանի ԶՈՒ-ն կրակ էր բացել նաև վիրավորում ստացած զինծառայողին տեղափոխող շտապօգնության մեքենայի ուղղությամբ:
«Իրականացվում է կոնսիլիումային բժշկական օգնության տրամադրում, և մեր բժիշկները կապի մեջ են, և մենք էլ Առողջապահության նախարարության հետ ինտենսիվ աշխատում ենք: Ինչ-որ անհրաժեշտ է, տրամադրվում է պացիենտներին: Դեղորայքային առումով հիվանդանոցային օղակը համալրված է անհրաժեշտ բոլոր պարագաներով»,- նշեց նախարարը՝ հավելելով, որ որոշակի աշխատանքներ են իրականացվում նաև Կարմիր խաչի հետ:
Անահիտ Ավանեսյանը նաև դատապարտեց շտապօգնության մեքենայի ուղղությամբ ադրբեջանական կողմի կրակոցները:
«Գիտեք, որ շտապօգնության մեքենաները և բժշկական ծառայություններ մատուցող կազմակերպությունները հատուկ օբյեկտներ են, և որևէ ձևով նրանց թիրախավորելն ընդունելի չէ»,- ասաց նախարարը:
Մանրամասները՝ տեսանյութում։
