15.12.2025 | 23:44
Ադրբեջանը պետք է դադարեցնի անձանց հսկողության MIRAS համակարգի ներդրումը. HRW
Ծառուկյանը չի ընդունում, որ կաշառք է տվել․ այսօր դատական առաջին նիստն էր․ ՏԵՍԱՆՅՈՒԹ
Քաղաքականություն
08.05.2023 | 18:41
Հակակոռուպցիոն դատարանում այսօր մեկնարկեց «Բարգավաճ Հայաստան» կուսակցութան առաջնորդ Գագիկ Ծառուկյանի և «Մուլտի գրուպ կոնցեռնի» տնօրեն Սեդրակ Առուստամյանի գործով առաջին դատական նիստը։ Նրանք մեղադրվում են 2017 թվականի Ազգային ժողովի ընտրությունների ժամանակ ընտրակաշառքի գործով։
Ազգային անվտանգության ծառայությունը երկու տարի առաջ խուզարկություն իրականացրեց Ծառուկյանի առանձնատանը, որից հետո հայտնեց ընտրողներին կաշառք տալու հոդվածով քրեական գործ հարուցելու մասին։ Ծառուկյանն ու Առուստամյանը մեղադրանքը չեն ընդունում։ Այս գործի վաղեմության ժամկետն անցել է, սակայն նրանք համաձայնություն չեն տվել ժամկետն անցած լինելու հիմքով իրենց նկատմամբ քրեական հետապնդումը դադարեցնելու վերաբերյալ:
«Եթե ես մեղավոր լինեի, համաձայն կլինեի, որ վաղեմության ժամկետն անցնելու հիմքով գործը կարճվեր»,- լրագրողների հետ զրույցում ասաց Ծառուկյանը:
Նման պնդում արեց նաև Առուստամյանը: Այս գործին ընթացք է տրվել Քաղաքաշինության կոմիտեի նախկին նախագահ Վահագն Վերմիշյանին ենթադրյալ կաշառք տալու գործով «Երևանշին» ընկերության տնօրեն Վազգեն Պողոսյանի բնակարանում իրակայացված խուզարկության արդյունքում։ Հենց այս խուզարկության արդյունքում են հայտնաբերել ենթադրյալ ընտրակաշառքին առնչվող փաստաթղթերը։
Ծառուկյանը, սակայն, պնդեց, որ ինքը որևէ փաստաթղթի հետ կապ չունի, նախաքննության ընթացքում էլ այս մասին ցուցմունք է տվել: Սեդրակ Առուստամյանը լրագրողներին ասաց, որ առերեսվել է Վազգեն Պողոսյանի հետ։ Դա նշանակում է, որ Պողոսյանի և Առուստամյանի ցուցմունքներում հակասություններ են եղել: Թե ինչ հակասությունների մասին է խոսքը, Առուստամյանը չմանրամասնեց` նշելով, որ այդ հանգամանքները դատական նիստով հրապարակվելու են:
Մանրամասները՝ տեսանյութում։
Արաքս Մամուլյան
