15.12.2025 | 09:31
Երևանի քաղաքապետարանի գործակարգավարական նիստը. ՈՒՂԻՂ
Ռուսական նավթի գնի վերին շեմը մեծ ծավալով խախտվում է
Քաղաքականություն
27.04.2023 | 23:02
Ռուսական նավթի գնի վերին շեմը, որն Արևմուտքը սահմանել է Ռուսաստանի նկատմամբ՝ Ուկրաինայի դեմ պատերազմի պատճառով, կարծես թե մեծ ծավալով խախտվում է։ Այս մասին գրում է Der Spiegel-ը՝ վկայակոչելով միջազգային փորձագետների խմբի հետաքննությանը, որը պատվիրվել է Կիևի Էկոնոմիկայի դպրոցի կողմից։
Հետաքննության նյութերի համաձայն՝ ռուսական Պրիմորսկի երկրամասի Կոզմինո նավահանգստում այս տարվա առաջին երեք ամիսներին արտահանման ուղարկված նավթի 95 տոկոսը վաճառվել է մեկ բարելի դիմաց 60 դոլարից բարձր գնով։ Վաճառքի միջին գինը մեկ բարելի դիմաց կազմել է 73 դոլար։
Նշվում է, որ Կոզմինոյից նավթը հիմնականում մատակարարվում է Ասիայի երկրներ։ Ռուսական նավահանգիստներում, որոնք տեղակայված են Արևմուտքին ավելի մոտ, գնային վերին շեմը, ընդհանուր առմամբ, պահպանվում է, պարզել են հետաքննության հեղինակները։
Հիշեցնենք, որ ռուսական նավթի դեմ պատժամիջոցների մեխանիզմը մշակվել է G7-ի երկրների, Եվրամիության և Ավստրալիայի նախաձեռնությամբ։ Որպես պատժամիջոցների իրականացման լծակ՝ որոշվել է օգտագործել ծովային տրանսպորտը, որտեղ գերակշռում են պատժամիջոցները նախաձեռնած երկրների ընկերությունները։ Նրանց արգելվում է փոխադրել ռուսական նավթ և ապահովագրել տանկերները, որոնք ռուսական նավթամթերք են տեղափոխում սահմանված վերին շեմից բարձր գներով։
Տաթև Ֆռանգյան
