25.11.2024 | 12:15
Իրակլի Կոբախիձեն ներկայացրել է Վրաստանի կառավարության նոր կազմը
Ալիևը Ֆրանսիայի ԱԳ նախարարին ասել է, թե Լաչինի միջանցքում անցակետի տեղադրումն «Ադրբեջանի ինքնիշխան իրավունքն է»
Քաղաքականություն
27.04.2023 | 15:08
Ադրբեջանի նախագահականը մանրամասներ է հայտնել այսօր Բաքվում տեղի ունեցած Իլհամ Ալիևի և Ֆրանսիայի ԱԳ նախարար Կատրին Կոլոննայի հանդիպումից։
Հրապարակված հաղորդագրության համաձայն՝ Ալիևը հայտարարել է, թե Լաչինի միջանցքում ապօրինի անցակետի ստեղծումն «Ադրբեջանի ինքնիշխան իրավունքն է ու տարածքային ամբողջականության ապահովումը»։
Ալիևը նաև նշել է, թե, իբր, 2020 թվականի նոյեմբերի 9-ի եռակողմ հայտարարության ստորագրումից ու պատերազմի ավարտից հետո Հայաստանը չի կատարում իր պարտավորությունները։
«Այս առնչությամբ մեր երկրի ղեկավարն ընդգծել է, որ Հայաստանը թույլ չի տալիս միջանցք ստեղծել Նախիջևանի հետ, դուրս չի բերում իր զորքերն ադրբեջանական տարածքներից, որտեղ ժամանակավորապես տեղակայված են ռուս խաղաղապահները, և օգտագործում է Լաչինի միջանցքը՝ զենք և այլ ռազմական արտադրանք Ղարաբաղ տեղափոխելու համար»,- ասվում է հաղորդագրությունում։
Նշենք, որ եռակողմ հայտարարության ստորագրման պահից Ադրբեջանը շարունակաբար խախտում է այն և Արցախի հայության էթնիկ զտման պետական քաղաքականություն վարում, որի վկայությունն են հենց Ալիևի հայտարարությունները։
Հիշեցնենք, որ Ադրբեջանը դեկտեմբերի 12-ից փակ է պահում Լաչինի միջանցքը՝ հրաժարվելով կատարել ՄԱԿ-ի Արդարադատության միջազգային դատարանի որոշումը։ Բացի այդ, ապրիլի 23-ին էլ Բաքուն ապօրինի անցակետ է տեղադրել Լաչինի միջանցքում։
Էմմա Չոբանյան
