Նախագահական ժամկետի սահմանափակումներն Էրդողանի վրա չեն տարածվում․ Թուրքիայի բարձրագույն ընտրական խորհուրդ

Թուրքիայի Բարձրագույն ընտրական խորհուրդը հրապարակել է հիմնավորված որոշում՝ նախագահի թեկնածուների առաջադրումների դեմ առարկությունները մերժելու վերաբերյալ, գրում է Bianet-ը։

Ամենաուշագրավ առարկությունը հիմնված էր երկարատև բանավեճի վրա՝ արդյո՞ք նախագահ Ռեջեփ Թայիփ Էրդողանը կարող է երրորդ անգամ առաջադրվել՝ չնայած սահմանադրական դրույթին, որ ոչ ոք չի կարող երկու անգամից ավելի ընտրվել։

Իշխող ճամբարը պնդում էր, թե դրույթն ուժի մեջ է մտել 2017 թվականի հանրաքվեից հետո՝ նախագահական համակարգին անցնելու համար, և սա կլինի Էրդողանի երկրորդ թեկնածությունը փոփոխությունից հետո։ Ընդդիմադիր կուսակցություններն էլ բողոքի էին ներկայացրել Էրդողանի թեկնածության առնչությամբ՝ նշելով, որ նրա առաջադրումը հակասում է Սահմանադրությանը։

Խորհուրդը մարտի 30-ին հրապարակել էր թեկնածուների վերջնական ցուցակը՝ մերժելով Էրդողանի, ինչպես նաև մյուս երեք թեկնածուների վերաբերյալ բողոքները։

Որոշման մեջ Խորհուրդը նշում է, որ 2018 թվականի ընտրություններն առաջինն էին Սահմանադրության 101 և 21/Ա հոդվածների դրույթներով։ Նախագահի պաշտոնավարման ժամկետը պետք է որոշվի նախորդ նախագահական և խորհրդարանական ընտրությունների ամսաթվի համաձայն։

«Առաջին կրկնակի ընտրությունների օրվանից՝ 2018 թվականի հունիսի 24-ից, առաջին հնգամյա ժամկետը սկսվում է այս օրվանից»,- ասվում է որոշման մեջ։

Հավելենք, որ Թուրքիայում մայիսի 14-ին տեղի կունենան նախագահական և խորհրդարանական ընտրություններ։

Նախագահի պաշտոնի համար առաջադրվել է 4 թեկնածու՝ իշխող «Ժողովրդական դաշինքի» թեկնածու, գործող նախագահ Ռեջեփ Թայիփ Էրդողանը, ընդդիմադիր «Ազգային դաշինքի» միասնական թեկնածու Քեմալ Քըլըչդարօղլուն, «Հայրենիք» կուսակցության առաջնորդ Մուհարեմ Ինջեն և ծայրահեղ աջ «ATA» դաշինքի թեկնածու Սինան Օղանը։

Էմմա Չոբանյան