10.04.2026 | 21:00
Կալուգացի օլիգարխի զարմիկը երբ ասում է երաշխավոր՝ նկատի ունի տեր․ իսկ իրենց տերը հայտնի է՝ ով է․ Ռուբեն Ռուբինյան. ՏԵՍԱՆՅՈՒԹ
Սահմանադրական դատարանը հրապարակել է Հռոմի ստատուտի գործով որոշման տեքստը
Քաղաքականություն
28.03.2023 | 00:57
Սահմանադրական դատարանի կայքում հրապարակվել է «Հռոմի ստատուտ»-ի վերաբերյալ որոշումը: Հիշեցնենք, որ մարտի 24-ին հրապարակված որոշման համաձայն՝ «1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրությունում և 1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրության 12-րդ հոդվածի 3-րդ մասի համաձայն Միջազգային քրեական դատարանի իրավազորությունը հետադարձորեն ճանաչելու մասին հայտարարությամբ ամրագրված պարտավորությունները համապատասխանում են Սահմանադրությանը»։
Հռոմի ստատուտը ստորագրվել է 25 տարի առաջ, սակայն մինչև այսօր Հայաստանն այն չի վավերացվել, քանի որ 2004 թվականին Սահմանադրական դատարանը դրանով սահմանված պարտականությունները հակասող էր ճանաչել այն ժամանակ գործող Սահմանադրության մի քանի դրույթներին։ 2022-ի տարեվերջին, սակայն, Կառավարությունը որոշեց, որ պետք է կրկին դիմել Սահմանադրական դատարան՝ կանոնադրության դրույթների սահմանադրականությունը որոշելու հարցով՝ հաշվի առնելով այն հանգամանքը, որ 2004-ից հետո Հայաստանում երկու անգամ Սահմանադրություն է փոխվել:
Նշենք, որ Հռոմի կանոնադրությամբ նպատակ է դրվել առավել ծանր հանցագործություններ կատարած անձանց անպատժելիությունը բացառել և դրանով նպաստել այդպիսի հանցագործությունների կանխումը։ Կանոնադրության հիման վրա ձևավորվել է միջազգային իրավասուբյեկտությամբ օժտված, մշտական հիմունքներով գործող Միջազգային քրեական դատարանը, որը կոչված է քրեական արդարադատություն իրականացնել միջազգային հանրության մտահոգությունը հարուցող առավել ծանր հանցագործությունների համար պատասխանատու ֆիզիկական անձանց նկատմամբ: Դատարանը կարող է քննել ցեղասպանության, մարդկության դեմ ուղղված, պատերազմական հանցագործությունները, ընդ որում` ոչ միայն միջազգային բնույթ ունեցող զինված ընդհարումների ժամանակ կատարված պատերազմական, այլև միջազգային բնույթ չունեցող զինված ընդհարումների ժամանակ կատարված պատերազմական հանցագործությունները, ինչպես նաև ագրեսիայի հանցագործությունը:
Կանոնադրության վավերացման անհրաժեշտությունն ու հրատապությունը, ըստ Կառավարության, առաջին հերթին պայմանավորված է Ադրբեջանի՝ Հայաստանի նկատմամբ դրսևորած ագրեսիայով, քանի որ պայմանագրի վավերացումը հնարավորություն կտա պատերազմական հանցագործությունների գործերով Ադրբեջանին պատասխանատվության կանչել Միջազգային քրեական դատարանում։ Սահմանադրական դատարանի որոշումը՝ այստեղ https://www.concourt.am/decision/decisions/6421e55c142ad_SDV-1680.pdf
