30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Քըլըչդարօղլուն հայտարարել է, որ մտադիր է Էրդողանին հաղթել առաջին փուլում
Քաղաքականություն
24.03.2023 | 17:30
Թուրքիայի ընդդիմադիր «Ազգային դաշինքի» նախագահի միասնական թեկնածու, գլխավոր ընդդիմադիր Ժողովրդահանրապետական կուսակցության (CHP) առաջնորդ Քեմալ Քըլըչդարօղլուն հայտարարել է, որ մտադիր է նախագահական ընտրությունների առաջին փուլում հավաքել ձայների ավելի քան 50 տոկոսը՝ շրջանցելով գործող նախագահ Ռեջեփ Թայիփ Էրդողանին, գրում է Duvar-ը։
Քըլըչդարօղլուն Halk TV հեռուստաընկերության «Առաջնորդների սեղան» հաղորդաշարի ժամանակ պատասխանելով հարցին՝ արդյո՞ք հանդիպելու է «Հայրենիք» կուսակցության նախագահ Մուհարեմ Ինջեի հետ, Քըլըչդարօղլուն ասել է. «Պարոն Ինջեն կուսակցության ղեկավար է։ Ես հարգում եմ բոլոր կուսակցությունները։ Իհարկե, որոշումը (նախագահի թեկնածու առաջադրվելը) նրա հայեցողությունն է։ Բայց որպես «Ազգային դաշինք»՝ մեր նպատակն է հաղթել առաջին փուլում և չհոգնեցնել Թուրքիային երկրորդ ընտրություններով։ Մենք չենք ուզում կորցնել նույնիսկ մեկ օր, մեկ ժամ։ Ցանկանում ենք հնարավորինս արագ որոշ հատուկ օրենքներ ընդունել երկրաշարժի տարածաշրջանի հետ կապված»։
Այս շաբաթվա սկզբին Ինջեն դիմել էր Բարձրագույն ընտրական խորհուրդ (YSK)՝ իր թեկնածությունը ներկայացնելու համար։ 2018 թվականի ընտրություններում Ինջեն առաջադրվել էր որպես CHP-ի նախագահի թեկնածու և ստացել ձայների 30 տոկոսը։
Նշենք, որ Թուրքիայի նախագահի թեկնածուն առաջին ընտրական փուլում հաղթելու համար պետք է հավաքի առնվազն 50 տոկոս գումարած մեկ ձայն, հակառակ դեպքում՝ անցկացվում է երկրորդ փուլ։
Հավելենք, որ Թուրքիայում նախագահական և խորհրդարանական ընտրությունները տեղի են ունենալու մայիսի 14-ին։
Էմմա Չոբանյան
