02.05.2024 | 16:43
ՌԴ-ն համագործակցում է այլ երկրների հետ՝ նվազեցնելու ԱՄՆ-ի պատժամիջոցների ռիսկերը․ Պեսկով
«Բարդ խնդիրները պարզ լուծումներ չունեն». Սի Ցզինպինը՝ Ուկրաինայում հակամարտության կարգավորման մասին
Քաղաքականություն
20.03.2023 | 13:38
Չինաստանի նախագահ Սի Ցզինպինը Մոսկվա այցի նախօրեին հոդված է գրել ռուսական լրատվամիջոցների համար, որտեղ խոսել է ռուս-չինական հարաբերությունների մասին և առանձին անդրադարձել Ուկրաինայում պատերազմին, գրում է BBC-ի ռուսական ծառայությունը։
ՉԺՀ ղեկավարը հայտարարել է, որ Չինաստանն օբյեկտիվ ու անխոչընդոտ դիրքորոշում ունի հակամարտության վերաբերյալ, ինչպես նաև ակտիվ ջանքեր է գործադրում խաղաղ բանակցությունների համար։
«Խոսքը, մասնավորապես, ՄԱԿ-ի կանոնդադրությանը, սկզբունքներին ու նպատակներին հետևելու անհրաժեշտության մասին է, հարկավոր է հարգել անվտանգության ոլորտում բոլոր պետությունների հիմնավորված մտահոգությունները, աջակցել ուկրաինական հակամարտության խաղաղ կարգավորմանն ուղղված բոլոր ջանքերին ու ապահովել արտադրությունների ու մատակարարումների համաշխարհային շղթաների կայունությունը»,- գրել է նա։
Սի Ցզինպինը հիշեցրել է նաև հակամարտության կարգավորման՝ 12 կետից բաղկացած իր ծրագիրը, որը հրապարակվել էր Ուկրաինա ռուսական ներխուժման տարելիցի օրը։ Արևմուտքում այս ծրագրի նպատակներն անիրատեսական էին անվանել։
«Բարդ խնդիրները պարզ լուծումներ չունեն։ Մենք համոզված ենք, որ ուկրաինական ճգնաժամից ռացիոնալ ելքն ու կայուն խաղաղության և համընդհանուր անվտանգության ճանապարհ աշխարհում կգտնվի, եթե բոլորն առաջնորդվեն ընդհանուր, համալիր, համատեղ ու կայուն անվտանգության հայեցակարգով, շարունակեն երկխոսությունն ու խորհրդակցությունները իրավահավասար, խելամիտ և պրագմատիկ ձևով»,- գրել է Չինաստանի ղեկավարն իր հոդվածում։
Ավելի վաղ չինական լրատվամիջոցները հրապարակել էին ՌԴ նախագահ Վլադիմիր Պուտինի հոդվածը։
Տաթև Ֆռանգյան
