Փաշինյանն ասաց, թե ինչն է կաշկանդում ասելու, որ Արցախը երբեք չի լինի Ադրբեջանի կազմում․ ՏԵՍԱՆՅՈՒԹ

Արդյոք Արցախը տեսնում է Ադրբեջանի կազմում, թե ոչ։ Այսօր հրավիրված ասուլիսում այս հարցին ի պատասխան վարչապետ Նիկոլ Փաշինյանը նշեց․ «Հայաստանի Հանրապետության օրակարգում է Լեռնային Ղարաբաղի ժողովրդի անվտանգության և իրավունքների հարցը։ Այն, ինչ այս վերնագրի ներքո և այս շրջանակի մեջ չի տեղավորվում, այդ հարցի շահառուն Լեռնային Ղարաբաղի ժողովուրդն է։ Ես ինչ եմ տեսնում, ինչ՝ ոչ, էական չի, էական է, թե ինչ է տեսնում Լեռնային Ղարաբաղի ժողովուրդը, և էական է, թե Լեռնային Ղարաբաղի ժողովուրդը միջազգային մեխանիզմի պայմաններում արդյոք հնարավորություն ունի հետապնդել իր իրավունքներն ու անվտանգության հարցերը։ Սա շատ կարևոր նրբություն է»։

Անդրադառնալով հարցին՝ արդյոք ինքը, որպես ՀՀ ղեկավար, որևէ բանով կաշկանդվա՞ծ է՝ հայտարարելու, որ Արցախը երբեք չի լինելու Ադրբեջանի կազմում, Փաշինյանը նշեց․ «Ես, իհարկե, կաշկանդված եմ շատ բաներով՝ Լեռնային Ղարաբաղի ժողովրդի անվտանգությամբ, Հայաստանի Հանրապետության անվտանգությամբ, Հայաստանի Հանրապետության ժողովրդի անվտանգությամբ, ձեր, բոլորի անվտանգությամբ, Հայաստանի ինքնիշխանությամբ, սուվերենությամբ, անկախությամբ, Հայաստանի պետական շահերով։ Իհարկե, կաշկանդված եմ, այլապես կգայի ու ընե՜ նց հայտարարություններ կանեի։

Նա նաև հիշեցրեց, որ իրեն շատ հաճախ մեղադրում են հենց այդպիսի հայտարարություններ անելու համար։

«Մեր հանրության համար արված և միջազգային հանրության մեջ արված հայտարարությունների միջև դիսոնանս չպետք է լինի։ Ֆունդամենտալ պրոբլեմն այն է, որ բանակցային ողջ գործընթացում մեր հանրության հետ խոսակցության և բանակցությունների սեղանի շուրջ խոսակցության միջև այնպիսի խզույթ է առաջացել, որ դարձել է դանդաղ գործողության ռումբ` Հայաստանի Հանրապետության և Լեռնային Ղարաբաղի տակ»,- նշեց Փաշինյանը։

Վարչապետի խոսքով` հիմա իր համար կարևոր է բանակցությունների սեղանի շուրջ և հանրության հետ նույն բանը խոսել, որն առնվազն նոր դանդաղ գործողության ռումբ Հայաստանի և Լեռնային Ղարաբաղի համար չստեղծվի։

Մանրամասները՝ տեսանյութում։