Քաղաքականություն
13.03.2023 | 18:00
Ուկրաինայի ԱԳՆ խոսնակ Օլեգ Նիկոլենկոն հերքել է այն տեղեկությունը, թե Վրաստանի նախկին նախագահ Միխեիլ Սաակաշվիլիի կողմնակիցները Թբիլիսի են ուղարկվել՝ ցույցերին մասնակցելու համար։
Ավելի վաղ Վրաստանի խորհրդարանի փոխխոսնակ Գիա Վոլսկին հայտարարել էր, որ բողոքի ակցիաների ֆոնին Սաակաշվիլիի մի խումբ կողմնակիցներ, ովքեր կռվել են Ուկրաինայի կողմից, ժամանել են երկիր՝ հեղափոխական սցենար իրականացնելու համար, փոխանցում է korrespondent-ը։
«Վրացական իշխանությունների ներկայացուցիչները մեղադրում են Ուկրաինային Վրաստանում պետական հեղաշրջում նախապատրաստելու, նրան Ռուսաստանի հետ պատերազմի մեջ ներքաշելու, քաղաքացիական պատերազմ հրահրելու համար ուժեր ուղարկելու մեջ: Մենք կտրականապես մերժում ենք նման մեղադրանքները, որոնք ընդհանուր ոչինչ չունեն իրականության հետ»,- գրել է Նիկոլենկոն ֆեյսբուքյան իր էջում։
Նա վստահեցրել է, որ Ուկրաինան կմնա «վրաց ժողովրդի բարեկամը, որին մաղթում է կանգ չառնել եվրոպական ապագայի զարգացման հարցում»։
Մարտի 7-ին, երբ Վրաստանի խորհրդարանն առաջին ընթերցմամբ ընդունեց «օտարերկրյա գործակալների» մասին օրինագիծը, Թբիլիսիում սկսվեցին զանգվածային բողոքի ցույցեր, որոնք ոստիկանները ցրեցին՝ արցունքաբեր գազ և ջրցան մեքենաներ կիրառելով։ Ներքին գործերի նախարարության տվյալներով՝ մարտի 7-8-ին տեղի ունեցած ցույցերի ժամանակ բերման է ենթարկվել 133 մարդ։ Հինգշաբթի առավոտյան իշխանությունները հայտարարեցին, որ հետ են կանչում օրինագիծը խորհրդարանից։ Ուրբաթ Վրաստանի խորհրդարանը երկրորդ ընթերցմամբ դեմ քվեարկեց օտարերկրյա գործակալների մասին օրինագծին։
Տաթև Ֆռանգյան
