Երեխային ալիմենտ վճարելու գործի քննությունը երկու տարի քննվում է. փաստաբան Թամարա Յայլոյան․ ՏԵՍԱՆՅՈՒԹ

«Իմ պաշտպանյալներից մեկը, որը դիմել էր իր խափանման միջոց կալանավորումը փոխելու վերաբերյալ, սակայն երբ իրեն հայտնել էին, որ դատավորը Շիրակի մարզից տեղափոխվել է այլ դատարան, ինչի հետևանքով իր խափանման միջոցի փոփոխման հարցը չի լսվելու, անձը հայտարարեց, որ հացադուլ կհայտարարի և միայն փաստաբանների խնդրանքով է, որ նա ծայրահեղ միջոցների չի գնացել»։ Այս մասին այսօր Շիրակի մարզի փաստաբանների ասուլիսում նշեց փաստաբան Թամարա Յալյոյանը։

Հիշեցնենք, որ փաստաբանների հայտարարության համաձայն՝ Շիրակի մարզի քրեական, քաղաքացիական, վարչական դատարանների դատավորները պարբերաբար փոխվում են՝ ինքնահոսի թողնելով դատական գործերը:
Փաստաբանի դիտարկմամբ՝ այնպիսի իրավիճակներ են ստեղծվում, որ մարդիկ անիմաստ են համարում դիմել դատարան զուտ այն պատճառով, որ դատավորներին տեղափոխում են։

շԹամարա Յայլոյանի խոսքով, քրեակատարողական հիմնարկներում, մարդիկ կան, որոնք իսկապես հոգնել են այդ իրավիճակից և ցանկանում են աղմուկ բարձրացնել, սակայն դա կանխվել է փաստաբանների հորդորների շնորհիվ: «Պաշտպանյալներիցս ոմանք ասում են, որ այնքան են նստել, որ պատժի ժամկետը լրանում է, մինչդեռ, մինչ այդ նրանք արդարացման ակնկալիքներ ունեին, իսկ հիմա, երբ պատժի ժամկետը լրացել է, այդքան ժամանակ ինքը կալանավայրում է եղել, ի՞նչ իմաստ ունի արդեն իր վերաբերյալ դատական ակտ կայացնելը։ Կան մարդիկ, որոնք խիստ դժգոհում են, որ ՔԿՀ-ից մեքենայով պարբերաբար գալիս են դատարան, բայց նիստերը հետաձգվում են, կրկին ստիպված վերադառնում են»,- նշեց փաստաբանը:

Նրա խոսքով՝ նաև արձանագրվել է փաստ, որ երեխային ալիմենտ վճարելու գործի քննությունը երկու տարի քննվում է։

Փաստաբանի հավաստմամբ, դեպք է գրանցվել, երբ դատավորների փոփոխության պատճառով գործն այնքան է ձգձգվել, որ պատասխանող կողմը մահացել և հիմա պետք է ևս 6 ամիս անցնի, որպեսզի իրավահաջորդ ճանաչվի և ամբողջ գործընթացը սկսվի նորից:

«Այսինքն՝ այնպիսի իրավիճակներ են ստեղծվում, որ մարդիկ անիմաստ են համարում դիմել դատարան զուտ այն պատճառով, որ դատավորներին տեղափոխում են»,- նշեց Յալյոյանը։

Մանրամասները՝ տեսանյութում։