27.04.2026 | 23:25
ՔԿ նախագահ Արթուր Պողոսյանի մասին գրառման համար ֆեյսբուքյան օգտատիրոջը մեղադրանք է առաջադրվել
Հայաստան-Ադրբեջան հարաբերությունները կմնան լարված, նաև Բաքվի կողմից ռազմական ճնշում գործադրելու պատրաստակամության պատճառով․ ԱՄՆ հետախուզություն
Քաղաքականություն
09.03.2023 | 15:22
ԱՄՆ Կենտրոնական հետախուզական վարչությունը, Հետախուզությունների դաշնային բյուրոն, Պաշտպանության նախարարության հետախուզական գործակալությունը և Ազգային անվտանգության գործակալությունը նախօրեին Կոնգրես են ներկայացրել «Գլոբալ ռիսկերի» ամենամյա զեկույցը։ Դրանում առանձին անդրադարձ է կատարվում Հայաստանի և Ադրբեջանի հարաբերություններին։ Նշվում է, որ երկու երկրների հարաբերությունները, հավանաբար, մնալու են լարված։
«Ադրբեջան-Հայաստան հարաբերությունները, ամենայն հավանականությամբ, կմնան լարված և երբեմն անկայուն խաղաղության պայմանագրի բացակայության պայմաններում՝ հաշվի առնելով միջպետական սահմանին ռազմական ուժերի մերձավորությունը, հրադադարի պահպանման մեխանիզմի բացակայությունը և Ադրբեջանի պատրաստկամությունը ռազմական ճնշում գործադրել՝ Հայաստանի հետ բանակցություններում իր նպատակներն առաջ տանելու համար»,- ասվում է զեկույցում։
Նշվում է, որ «սահմանազատված սահմանի երկայնքով մոտակայքում ռազմական ուժերի շարունակական ներկայությունը բարձրացնում է Հայաստանի և Ադրբեջանի միջև զինված առճակատման վտանգը, թեև նման առճակատումները, հավանաբար, կլինեն սահմանափակ տևողությամբ և ինտենսիվությամբ»։
Զեկույցում նաև փաստված է Ադրբեջանի ագրեսիան Հայաստանի ու Արցախի դեմ։
«2021 թվականի մայիսից պարբերաբար ռազմական բախումներ են տեղի ունենում միջպետական սահմանին և Լեռնային Ղարաբաղի շուրջ։ Առավել ինտենսիվ բռնկումը տեղի է ունեցել 2022 թվականի սեպտեմբերին, երբ ադրբեջանական ուժերը համակարգված հարձակում են սկսել սահմանի երկայնքով մի քանի վայրերում՝ գրավելով հայկական որոշ տարածքներ և հանգեցնելով շուրջ 300 զինվորականի մահվան: Խաղաղության բանակցություններում որոշակի առաջընթաց է գրանցվել, սակայն ամենամարտահրավերային հարցերը՝ կապված պետական սահմանների ու Լեռնային Ղարաբաղի ապագայի հետ, հեռու են լուծվելուց»,- ասվում է զեկույցում։
Էմմա Չոբանյան
