«Խաչմերուկներ․ ժամանակակից երաժշտության օրեր Հայաստանում» փառատոնի շրջանակում համերգներ կկազմակերպվեն Երևանում ու Գյումրիում

«Խաչմերուկներ․ ժամանակակից երաժշտության օրեր Հայաստանում» միջազգային փառատոնն այս տարի կանցկացվի ապրիլի 3-26-ը։ 6-րդ անգամ կազմակերպվող փառատոնը համերգներ կներկայացնի ոչ միայն Երևանում, այլև Գյումրիում։

«Խաչմերուկներ» ժամանակակից երաժշտության միջազգային փառատոնը միակն է Հայաստանում, որտեղ ներառվում են համաշխարհային ժամանակակից ակադեմիական երաժշտության մեծաքանակ նոր և նշանակալից գործեր։ Ընդ որում՝ դրանց զգալի մասն առաջին անգամ է կատարվում, այսինքն՝ փառատոնը բեմ է հանդիսանում դրանց հայաստանյան և համաշխարհային պրեմիերաների համար։ Փառատոնը մշտապես նպատակ ունի ապահովելու համաշխարհային ժամանակակից երաժշտության տարածումը և զարգացումը Հայաստանում։ Ուստի տարբեր տարիներին այն իր ծրագրում ներառում է մի շարք նոր ստեղծագործությունների հայաստանյան պրեմիերաներ, որոնց կատարումը վստահվում է Հայաստանում միակ ժամանակակից երաժշտության անսամբլին՝ «Ասոնանս»-ին»,-նշում են փառատոնի նախաձեռնող «Քառորդ տոն» մշակութային ՀԿ-ից։

Ծրագիրն ամեն տարի հնարավորություն է ստեղծում հայ երաժշտասեր հասարակության համար՝ մշտապես տեղեկացված լինելու արդի ժամանակակից դասական երաժշտության զարգացումներին և միտումներին, ինչպես նաև նպաստում է նոր ստեղծագործությունների ստեղծմանը։

Փառատոնի շրջանակներում այս տարի կկազմակերպվի 7 համերգ, «Առնո Բաբաջանյան» համերգասրահում, Կոմիտասի թանգարան-ինստիտուտում, Գաֆեսճյան արվեստի կենտրոնում, ՀԲԸՄ Հայաստան դահլիճում և Գյումրու Տեխնոլոգիական կենտրոնի դահլիճում։ Փառատոնի շրջանակում ելույթներով հանդես կգան դաշնակահար և կոմպոզիտոր Իվ Էգոյանը (Կանադա), դաշնակահար Հայկ Մելիքյանը (Հայաստան), դաշնակահար Լորանս Մխիթարյանը (Բելգիա), «Ասոնանս» անսամբլը (Հայաստան) և Երևանի պետական կոնսերվատորիայի ուսանողները։

Փառատոնի շրջանակում անցկացվում են նաև վարպետության դասեր և սեմինարներ, որոնց միջոցով զարգանում է կոնսերվատորիայի և այլ երաժշտական հաստատությունների ուսանողների աշխարհայացքը, երաժշտության վերլուծության կարողությունները և ընկալման գաղտնիքները։ Այս տարի ևս նախատեսվում է իրականացնել մի շարք վարպետության դասեր։ Տեղի կունենա վարպետության դաս կոմպոզիտոր Յուրի Կասպարովի (Ռուսաստանի Դաշնություն) և սեմինար երաժշտագետ և ձայնային տեսաբան Գաշիա Ուզունյանի (Միացյալ Թագավորություն) մասնակցությամբ։