«Մարզադաշտերը պատկանում են քաղաքմարդկանց». Թուրքիայի ֆուտբոլային երկրպագուների խմբերը աջակցել են երկրաշարժի բողոքի ցույցերին կառավարության դեմ

Թուրքիայում մեծ իրարանցում սկսվեց այն բանից հետո, երբ թուրքական ֆուտբոլի «մեծ եռյակից» երկու թիմերը՝ «Ֆեներբահչեի» և «Բեշիքթաշի» երկրպագուները հանգստյան օրերին կայացած հանդիպումների ժամանակ վանկարկեցին, որ կառավարությունը պետք է հրաժարական տա, գրում է Bianet-ը։

Մասնավորապես, «Ազգայնական շարժում» կուսակցության նախագահ, Թուրքիայի նախագահ Ռեջեփ Թայիփ Էրդողանի կոալիցիոն գործընկեր Դևլեթ Բահչելին կոշտ արձագանքել էր ցույցերին՝ չեղարկելով «Բեշիքթաշ»-ին իր խորհրդին անդամակցությունը և երկրպագուներին մեղադրելով «երկրաշարժի նահատակների» նկատմամբ անհարգալից վերաբերմունքի մեջ։ Նա նաև առաջարկել էր, որ ֆուտբոլային հանդիպումներն անցկացվեն առանց հանդիսականների կամ «նախազգուշական միջոցներով»։

Բահչելիին արձագանքել է ֆուտբոլի երկրպագուների 16 խումբ՝ հայտարարություն տարածելով։

«Այս ծանր օրերին, որում հայտնվել է մեր երկիրը, մենք միասին ենք բուժելու մեր երկրաշարժը վերապրածների վերքերը: Մենք 85 միլիոն մարդու կողքին ենք»,- հայտարարել է խումբը, որի կազմում են նաև «Գալաթասարայի», «Ֆեներբահչեի» և «Բեշիքթաշի» երկրպագուների խմբերը։

Նրանք գրավոր հայտարարության մեջ հերթական անգամ դատապարտում են «քաղաքական այլանդակ հաշվարկներն» ու «հիմար անկարողությունը» նրանց, որոնք «փրկարարական աշխատանքները ձգձգեցին», և նրանց, որոնք «ժողովրդի հարկերով գնված վրաններն են վաճառել»։

Հավելենք, որ Թուրքիայի կառավարությունը քննադատության է ենթարկվում փետրվարի 6-ի երկրաշարժից հետո ենթադրյալ դանդաղ և ոչ համարժեք արձագանքի համար: Բացի այդ, փետրվարի 25-ին հրապարակված զեկույցում պարզվեց, որ աղետից հետո թուրքական Կարմիր մահիկը վրաններ է վաճառել բարեգործական մի խմբի։

«Ֆեներբահչեի» երկրպագուների վանկարկումները հանգեցրել են նրան, որ ակումբի երկրպագուներին արգելվել է ներկա գտնվել մարտի 4-ին կայանալիք «Կայսերիսպորի» հետ արտագնա խաղին։ Ակումբն արդեն հայտարարել է, որ այս որոշումն «անընդունելի է»։

Էմմա Չոբանյան