Oտարերկրյա գործակալների մասին օրինագիծը սպառնում է քաղհասարակությանը. Վրաստանում ՄԱԿ-ի գրասենյակ

Վրաստանում ՄԱԿ-ի գրասենյակը խորը մտահոգություն է հայտնում «Օտարերկրյա ազդեցության թափանցիկության մասին» օրենքի նախագծի վերաբերյալ և կարծիք հայտնում, որ դրա ընդունումը սպառնում է քաղաքացիական հասարակության և լրատվամիջոցների գործունեությանը և նրանց նշանակալի ներդրմանը Վրաստանում ժողովրդավարության կայացման գործում, հաղորդում է Նովոստի Գրուզիան:

«Նման օրենքի ընդունումը կարող է դժվարացնել ՄԱԿ-ի աշխատանքը Կայուն զարգացման համագործակցության համաձայնագրի՝ երկրի ռազմավարության շրջանակում, որը մենք ստորագրել ենք Վրաստանի կառավարության հետ»,- ասվում է հայտարարության մեջ։

«Օտարերկրյա ազդեցության թափանցիկության մասին» օրենքի նախագիծը խորհրդարանում նախաձեռնել է «Ժողովրդի իշխանություն» շարժումը, որն իշխող կուսակցության հետ միասին խորհրդարանական մեծամասնության մաս է կազմում։ Այսօր նույն շարժումը խորհրդարան է ներկայացնում մեկ այլ օրինագիծ՝ «Օտարերկրյա գործակալների գրանցման մասին»։

«Քաղաքացիական հասարակության գործունեության խարանումը կարող է խոցելի խմբերին թողնել առանց համապատասխան աջակցության, այդ թվում՝ հաշմանդամություն ունեցող անձանց, տեղահանվածներին, փոքրամասնություններին, տարեցներին, կանանց, երիտասարդներին, երեխաներին, ընտանեկան բռնության զոհերին և այլոց, որոնք արդյունավետ աջակցության և օգնության կարիք ունեն»:

Օրինագիծը սպառնում է այնպիսի իրավունքների հարգմանը և պաշտպանությանը, ինչպիսիք են միավորվելու և արտահայտվելու ազատությունը, հանրային գործունեությանը մասնակցելու իրավունքը, անձնական տվյալների գաղտնիության և պաշտպանության իրավունքը և խտրականության արգելքը:

Տաթև Ֆռանգյան