Արևմուտքը ՌԴ-ի միջուկային շանտաժից է զգուշանում․ վառոդի տակառի վրա ենք, որը կարող է պայթել․ Արմեն Վարդանյան. ՏԵՍԱՆՅՈՒԹ

ՆԱՏՕ-ի կենտրոնակայում նախօրեին կայացավ դաշինքի անդամ երկրների պաշտպանության նախարարների համատեղ նիստը, որին նաև Ուկրաինան էր մասնակցում։ Թեև ոչ ամբողջ ինֆորմացիան է հասանելի դարձել, սակայն հայտնի է, որ առաջնային է համարվել Ուկրաինայի հակաօդային պաշտպանության համակարգի ամրացումը՝ նոր մատակարարումներով։

Մինչ կատաղի մարտերը շարունակվում են Բախմուտի ուղղությամբ՝ Բրյուսելում ՆԱՏՕ-ի գործընկեր 54 պետություն էր մասնակցում Ուկրաինային աջակցող հավաքին։ Կրեմլի խոսնակ Պեսկովն է արձագանքել ռուսներին պատերազմում հաղթելու համար հնարավորինս օգնելու պատրաստակամության մասին արևմտյան առաջնորդների հայտարարություններին, թե դա էլ չի օգնի Ուկրաինային․ «ՆԱՏՕ-ն մեզ համար թշնամական կառույց է, որն օրեցօր ընդգծում է իր ավելի խորը ներգրավվածությունը Ուկրաինայի հետ հակամարտությունում։ Իսկ կարո՞ղ է այդ ներգրավվածությունը ինչ-որ բան փոխել։ Ո՛չ, չի կարող»։

Իսկ Ուկրաինայի նախագահ Զելենսկին շնորհակալություն է հայտնել դաշնակիցներին օգնությունը չթուլացնելու համար։

Քաղաքագետ Արմեն Վարդանյանը Factor TV-ին տված հարցազրույցում ասում է, որ պատերազմի հենց սկզբից է Արևմուտքը որոշել, որ թույլ չի տալու ՌԴ-ի հաղթանակը Ուկրաինայի դեմ պատերազմում։

«Եթե ՌԴ-ին հաջողվի կուլ տալ, կլանել Ուկրաինան, դա Արևմուտքի համար ողբերգական հետևանքներ կունենա։ Կլինի աշխարհակարգի փոփոխություն, դա թույլ կտա ՌԴ-ին և միջազգային այլ խոշոր խաղացողների իրենց ձեռնտու պայմաններով և ձեռնտու ժամանակահատվածում ներխուժել այլ երկրներ և անպատիժ մնալ, տարածքներ գրավել։ ՌԴ-ի հաղթանակի պարագայում կփոփոխվի աշխարհակարգը, իսկ աշխարհակարգի գլխավոր երաշխավորն Արևմուտքն է»,- ասաց Արմեն Վարդանյանը։

Հարցազրույցն ամբողջությամբ՝ տեսանյութում։

Ռոբերտ Անանյան