17.12.2025 | 16:05
ՆԱՏՕ-ի գլխավոր քարտուղարի տեղակալը վաղը Հայաստան կայցելի
Պուտինը պարտվել է էներգետիկ պատերազմում. Ուրսուլա ֆոն դեր Լեյեն
Քաղաքականություն
15.02.2023 | 19:53
Ուկրաինա ռուսական ռազմական ներխուժման առաջին տարելիցի նախաշեմին Եվրահանձնաժողովի նախագահ Ուրսուլա ֆոն դեր Լեյենը բարձր է գնահատել ԵՄ-ի միասնական պատասխանը ռուսական ագրեսիային, գրում է DW-ի ռուսական ծառայությունը։
«Պատերազմի սկզբում ՌԴ նախագահ Վլադիմիր Պուտինը կարծում էր, որ կկարողանա շանտաժի ենթարկել ռուսական գազից կախված Եվրոպային, բայց նա սխալ հաշվարկեց։ Պատերազմի սկզբից մեկ տարի անց նա պարտվեց էներգետիկ պատերազմում, որն ինքն էր սկսել»,- ասել է նա՝ Ստրասբուրգում ելույթ ունենալով Եվրախորհրդարանում:
Ըստ ֆոն դեր Լեյենի՝ ԵՄ-ն հարմարվել է իրավիճակին, դիմել է վստահելի գործընկերների և այժմ կարող է տեսնել առաջին հաջողությունները։
«Ռուսաստանի եկամուտը Եվրոպային նավթ և գազ վաճառելուց նվազել է երկու երրորդով, իսկ ԵՄ-ում գազի գներն այժմ ավելի ցածր են, քան պատերազմի մեկնարկից առաջ։ Բացի այդ, Եվրոպան խաղադրույք է կատարում կանաչ էներգիայի և էներգետիկ ինքնավարության վրա։ Մեզ շանտաժի ենթարկելու՝ Պուտինի փորձը ձախողվեց»,- ընդգծել է Եվրահանձնաժողովի ղեկավարը։
Տաթև Ֆռանգյան
