20.04.2026 | 16:45
Սերժ Սարգսյանի ստորագրած հողամասի վաճառքի դիմաց ՀՀ-ին կվերադարձվի 78.8 մլն դրամ․ Դատախազություն
Մոսկվան հայտարարել է, թե որ դեպքում կողջունի Բաքու-Երևան-Թբիլիս եռակողմ բանակցությունները
Քաղաքականություն
10.02.2023 | 16:06
Ռուսաստանը կարող է ողջունել եռակողմ երկխոսությունը Հայաստանի, Ադրբեջանի և Վրաստանի մասնակցությամբ, եթե այն նպաստի Կովկասում հակասությունների կարգավորմանը, տարածաշրջանում կայունության և անվտանգության ամրապնդմանը։ Այս մասին իր ամենշաբաթյա ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
«Մոսկվան բազմիցս ասել է իր գործընկերներին, որ յուրաքանչյուր պետություն իրավունք ունի մասնակցել այն միջազգային ձևաչափերին, որոնք համապատասխանում են իր շահերին և ուղղված չեն երրորդ երկրների դեմ, ինչպես նաև հաշվի են առնում ուժերի առկա հաստատված հավասարակշռությունը։ Եթե այս նախաձեռնության հետևում տեսանելի են Վաշինգտոնի և Բրյուսելի ուրվագծերը, որոնք ձգտում են խաթարել Հայաստանի, Ադրբեջանի և Ռուսաստանի ղեկավարների միջև եռակողմ պայմանավորվածությունների իրականացումը, ապա սա բոլորովին այլ պատմություն է»,- նշել է ՌԴ ԱԳՆ ներկայացուցիչը։
Զախարովայի խոսքով՝ հենց եռակողմ համաձայնագրերն են հիմք հանդիսանում Երևանի և Բաքվի միջև հարաբերությունների կարգավորման համար։ Այս ձևաչափի շրջանակում 2020 թվականից առանցքային գործընթացներ են սկսվել հաղորդակցությունների ապաշրջափակման, հայ-ադրբեջանական սահմանի սահմանազատման, խաղաղության պայմանագրի մշակման, ինչպես նաև հասարակական, փորձագիտական և խորհրդարանական շրջանակների ներկայացուցիչների միջև կապերի հաստատման ուղղությամբ։
Անդրադառնալով Անդրկովկասում ձևաչափերին՝ նա մատնանշել է 3+3 հարթակը, որն ընդգրկում է միայն Անդրկովկասի երեք պետությունները, ինչպես նաև Ռուսաստանը, Թուրքիան և Իրանը։
«Այս մեխանիզմը թույլ է տալիս համատեղել տարածաշրջանի ավելի լայն շրջանակի երկրների շահերը: Սա, ի թիվս այլ բաների, պետք է աշխատի հարթել նրանց միջև առկա հակասությունները, զարգացնել առևտրատնտեսական, տրանսպորտային, մշակութային և հումանիտար կապերը, պայքարել ընդհանուր մարտահրավերների և սպառնալիքների դեմ»,- ասել է Զախարովան։
Տաթև Ֆռանգյան
