17.12.2025 | 23:55
ՊՍԺ-ն՝ Միջմայրցամաքային գավաթի հաղթող․ ՏԵՍԱՆՅՈՒԹ
ԼՂ ՄԱԿ-ի խաղաղապահներ ուղարկելու գաղափարը հազիվ թե իրատեսական է․ ՌԴ ԱԳՆ
Քաղաքականություն
08.02.2023 | 13:00
ՌԴ ԱԳՆ-ում կարծում են, որ Լեռնային Ղարաբաղ ՄԱԿ-ի խաղաղապահներ ուղարկելու գաղափարը հազիվ թե իրատեսական է, իսկ տարածաշրջանում խաղաղության և անվտանգության վերականգնման խնդիրներն արդյունավետորեն լուծում է ռուսական խաղաղապահ զորակազմը։ Այս մասին ՌԻԱ Նովոստիին տված հարցազրույցում ասել է ՌԴ ԱԳՆ միջազգային կազմակերպությունների դեպարտամենտի տնօրեն Պյոտր Իլյիչևը։
Նա նշել է, որ միջազգային և օտարերկրյա կազմակերպություններից Ղարաբաղում մինչ օրս աշխատում է միայն Կարմիր Խաչի միջազգային կոմիտեն, իսկ «ՄԱԿ-ի մարդասիրական գործակալություններն ադրբեջանցիներից և հայերից թույլտվություն չեն ստացել մուտք գործել անկլավ, նույնիսկ կարիքների գնահատման առաջնային առաքելություն իրականացնելու համար»:
Իլյիչևի խոսքով՝ «դժվարություններն առաջանում են կողմերի հետ հավասար հեռավոր դիրք պահպանելու անկարողության պատճառով, ներառյալ՝ տարածաշրջան մուտքի և ելքի եղանակները, հաշվետվությունները, վերահսկողությունը և մարդասիրական գործունեության կառուցման իրավական հիմքերը»:
«Այս պայմաններում Լեռնային Ղարաբաղին նույնիսկ միջազգային մարդասիրական օգնություն տրամադրելու հարցում առաջընթաց չկա, միջազգային խաղաղապահ զորակազմի գործուղման գաղափարի գործնական իրականացումը, որն առավել ևս կպահանջի ՄԱԿ-ի Անվտանգության խորհրդի պատժամիջոցները, դժվար թե իրատեսական լինի։ Ելնում ենք այն հանգամանքից, որ ռուսական խաղաղապահ զորախումբն արդյունավետորեն հաղթահարում է Լեռնային Ղարաբաղում խաղաղության և անվտանգության վերականգնման բոլոր խնդիրները»,- ասել է Իլյիչևը։
Բացի այդ, ըստ ռուս դիվանագետի, ՄԱԿ-ի Անվտանգության խորհրդի մանդատի ներքո տեղակայված խաղաղապահ առաքելությունները ոչ միշտ են վայելում ընդունող պետությունների վստահությունը։
Տաթև Ֆռանգյան
