30.11.2024 | 01:27
ՀՀ-ն հետ է կանչել Սիրիայում հումանիտար ականազերծման և բուժաշխատողների մասնագիտական խմբի ողջ անձնակազմին
Ադրբեջանն ակտիվորեն ուսումնասիրում է Թուրքիայի փորձը՝ ուժեղ բանակ ստեղծելու համար․ Զաքիր Հասանով
Քաղաքականություն
06.02.2023 | 22:15
Ադրբեջանը շահագրգռված է հզոր բանակ ստեղծելու հարցում և այդ ուղղությամբ Թուրքիայի հետ ակտիվ աշխատանքներ են տարվում։ Այս մասին հայտարարել է Ադրբեջանի ՊՆ ղեկավար Զաքիր Հասանովը պետական AZTV-ին տված հարցազրույցում, գրում են տեղական լրատվականները։
«Ադրբեջանի նախագահ Իլհամ Ալիևն իրավացի է, երբ նշում է, որ աշխարհում զինված բախումների թիվն աճում է։ Ուստի Ադրբեջանը շահագրգռված է հզոր բանակ ստեղծելու հարցում և մեծ աշխատանք է տարվում այս ուղղությամբ։ Մենք ծանոթանում ենք թուրքական բանակի մարտական գործունեությանը, ուսումնասիրում ենք այն, օգուտ ենք ստանում ՆԱՏՕ-ում նրանց փորձից։ Այս ամենը լավ աջակցություն է մեր մարտական գործունեությանը»,- ասել է Հասանովը։
Անդրադառնալով Կարսում անցկացված վերջին համատեղ զորավարժություններին, որոնք ավարտվել են փետրվարի 2-ին, Հասանովը նշել է, որ նման եղանակային պայմաններում վարժանքների անցկացումը շատ կարևոր է։
«Ընդհանուր առմամբ, ցանկացած զորավարժություն հետապնդում է որոշակի նպատակներ։ Յուրաքանչյուր զորավարժության ընթացքում ուսումնասիրվում է վերջին շրջանում աշխարհում տեղի ունեցող հակամարտությունների, պատերազմների փորձը։ Բնականաբար, զորավարժություններում կիրառվում է դրական փորձը, այն ուսումնասիրվում է և հետագայում գործնականում կիրառվում»,- ասել է Ադրբեջանի ՊՆ ղեկավարը։
Նա նաև նշել է, որ թուրքական բանակն աշխարհում ամենաուժեղներից մեկն է, և ադրբեջանական բանակը, մասնակցելով համատեղ զորավարժություններին, ուսումնասիրում է այդ փորձը և ներմուծում իր մարտական պատրաստության մեջ։
«Յուրաքանչյուր երկիր պետք է ունենա հզոր բանակ, որպեսզի հակառակորդը հավակնություններ չունենա օտար տարածքների նկատմամբ»,- հայտարարել է ադրբեջանցի պաշտոնյան։
Էմմա Չոբանյան
